Ramdang nuamhnak Vs Lailei nuamhnak Biaruah

Laihlum Hngelh Huai le Ramdang um Jack Smith Zendul

Ramdang nuamhnak Vs Lailei nuamhnak Debate

Laimi Chungin ramdang a phanmi hi kan tam taktak cang, Laihlum laimi nak in Ramdang hlum laimi hi tamdeuh dawh kan si cang, lailei  umnih ramdang um kan haw i ramdang umnih lailei ngaih cio  a si, ramdang a nuamhnak chim ahcun a tor lengluang lai cubantuk cun lailei a nuamhnak chim ahcun a tam emem ve kolai, a si nain nuamhnak hmunhma, thilri le boruak aa dang dih lai, a sinain kan i nuamhnak feeling, a thawtnam, kan lungnih a hei teh mi khi cu aikhat dih ko,  ramdang um mi nih fun world i vakal in a a phun, nuamhnak ca i chiahmi item, citmi a phunphun, atanglei Laihlum Kawi Huai le ramdang um JS Zeng Debate hi zoh uhlaw a fiang cem lai

Ramdang nuamhnak

Lai lei nuamhdan

Ramdang swimming pool

Lailei swimming pool

Ramdang um JS Zendul: Ramdang ummi kan nih cu swiming pool hna ah kan kal, lai lei cu swimming pool zong a umlo,zoo park hna kan kal, fun world ah kan kal i thideng in kan i nuam, beach te hna ah kankal, night club hna ah kan kal i karaoke kan sa, kan lam, kan duh ah beer, kan duh ah vodka,red label, black dog, kan ding, kan duh poah in motor, suzuki, mazada, tata, pajero, Lamborghini, kan i mongh, zeitin hme lailei ummi cu kan i mah nak cun nan i nuamh deuh khawh lai zohhna kan i nuamhnak hmanthlak pawl hi

Swimmingpool

Laihlum hngel Huai: kan nih lailei cun kan duh ah nungak tlangval khat tuh in kan i pum i kan duh ah love song, love song kan duh lo si le pathian hla, pathian hla kan duh lo si le hla puarpok, kan duh ah dei lai tiangzong thlapavang tangah lam kan leng, kan huam tik poah ah tuluk ser Kenbo R 125 in hakha thanthlang kan kar, kan duh ah Grand, kan i cawk duh lo ah OB, Mandalay Rum, kan duh lo ahcun zuhui kan i tuah, laizu kan ding, kan duh caan ah nungak tlangval he khat tthuih in tiva kan kal, capo kan sai, kan huam caan ah kan ttuan huam lo caan ah kan it, kan ih lo hmanh ah kan zau, kan duh ah kehthei kan hrawng, kan duhah ram hna kan vai, sakhi, sazuk, nengpi, etc kan kah hna, cucaah cun ramdang ummi hi zeitin hmanh in kan mah nakcun nan i nuam deuh bal lai lo ai theituk mi a si ko chim hau lo a si zoh ve kan i nuamhnak hmanthlak pawl hi

tiva kan kal lio

nga kan tleihmi

ram dang ahcun mi kutang ah rian ttuan, huam zong huam lo zongah ttuan caan a phanh ahcun ttuan, khua machal ah lailei nih le ngaih, lungretheih lonak nak in lungretheihnak a tam deuh tuk tiah an ti ringring ko.  nga kan dawi lio tal kan i kalh mi hna hi zoh tuah, ramdang ahcun nga cu na dawi bal ve ma, ramdang nuam deuh na hei ti lengmang ve.

ngadawi lio

Ramdang um JS Zendul: ashi dai ko kan umnak khua hna hi zoh ca, lailei tlangcung cepa dawnnak tlang i umnak cun hi ram um cu a nuam deuh tuk mi si ko cu ta ai thei ko mi

Ramdang khuadawh

Laihlum Hngelh Huai: zoh ve ca mahtluk in fing le tlang nih a phanhmi khua, thlichia le tilet zong phan awk a um lo mi khua lai lei khua hi, khuazei ram ahdah na hmuh ti lai, ramdang insang na umnak khan tla kolaw na ruh hna kiak sehlaw lai lei inn te kha na ti ve kolai cuh.

Lai Lungrawn khuazung

Biaceihtu Naal Thang Piang: Kawi Hngelh le Zendul nan debate hi ruah lengmang ti ah nan i tluk bak te si ko, a ho dah hmak tamdeuh kan pek hna lai ti awk thei si lo cucaah cun biatlang kawm ko hna usihlaw,  nuamhnak kan timi cu nan mah nan i nuam deuh, kan mah kan i nuam deuh timi a um lo, kan i nuamhdan adang lai, nain kan lungnih a tehmi, khansa mi kha cu a rak i khat dih ko.

  

"Na Kong Ruat In"

Na kong ka ruat, kai hngilh kho lo

khuadang ruatning, ka ti zawn ah

na kong ttheu ah, ka tla tthan tawn

na mui thlam hi, ka mitthlam ah 

loh ai timlo, iangngei ka dawt.

Deirel arfi ,chuah lai te i

kai hngilh zawn ah, kan manh phanh tawn

zingthawh pah in, a dam hnga maw

ti ka ruah hi, a tlawmti lo

maw zuunngaih fah, ka tuar khawh lo cu.

Na kong ruah le, na muithlam le

na zuun ngaih in, nithla rel hi

a fawihrim lomu, kei ka caah

tlengkhat tthumi, vanva bangin

lungduh biazaa, kan phai tawn kha

ka ngai hringhran, a lang lomi 

vairawn deng in, zeican tiang hme

na zuunngaih le, na kong ruat in

ni le thla hi, ka rel rih lai 

IANGNGEI KA DAWT..............

Kurdish Nu le Kachin Nu pawl Raltuknak

  Kurdish Nu le Kachin Nu pawl Raltuknak 

Chaklei Iraq ram i a ummi, Kurds/Kurdish miphun cu ka mah Chin miphun bang tlancungmi ethnic an si ve, Kurdistan tizong in theih an si i an ram hi, Iran, Iraq, Syria le Turkey nih a kulh cucaah an ISIS pawl center khan ah a tla ISIS nih sumphomh in an phomh hna lengah lungden in an den hna, an nuhrin covo an buar piaktuk luakchuak cang, a hlei in Kurds nu pawl an cungah an tuahsernak a chiatuk hringhran, nu pawl nawlngeihnak/ women right an buartuk caah Kurdish nu pawl cu biatak tein meithal an i tleih i Kurdish nu pawl humhimnak caah ti'n an dawtmi hi Canteen kaltti, social media in zan fachial tlangval he i chat te hna an kaltak, chungkhar ah nuam taktak in um i zinglei duhcan tiang poah ih, chun ah tlangval he fun world te hna va kal tti te hna kha ruat bak lo in biatak tein ISIS cu an doh hna,

                                 Kurdishs Nu ralkap pawl

An biachim le an khuaruahnak vunzoh lengmang tik hna ah thilhman lo a si mi cu dohbak ding timi lungput an ngei dih i uar an um taktak, Kurds nu pawl kan himbawmnak, zalennak, nawlngeihnak, harnak phunkip in luatnak caah cun kan mah nupawl hrimhrim nih kan doh a hau, ttan kan lak ah a herh timi ruahnak an ngei, Hramhram mithah hmang ISIS, kurdish nu vialte a kan pamhheih dihtuk cu kan mah nu hrimhrim nih kan doh ve hna lai an ti, cu ticun an ram humhimnak le nupawl humhimnak caah biatak tein ral an do i, AK 47 le M-16 he chunza hlan in tlang an kai zawn, hor an hrawn zawn a si ko.

Kurd nu nih tlangpar in ISIS an thlingthlak hna lio

Kurds nu pawlnih an ram le miphun luatnak, nupawl humhimnak, an covo hmantein tinco khawhnak dingah biatak tein ISIS ralhrang an do hna bantuk in kan kawl ramchung ah nupawl nih biatak tein ral a do ve mi cu Kachin hi an si

                                            KIA nu ralkap

" Kan ram luatnak le miphun zalennak hmuhkhawhnak caah cun pa lawng nih ttuan, raldo a za lo nuzong nih ral kan tuk ve hau an ti" i raltuk cu an ngamh ve i biatak tein methal an i tleih, Kachin ram nupawl kawl ralkap nih an tleihhrem lengmang mi hna an hmuh tik ah an lung a fak, an thin a khoih hna, cucaah kawl ralkap dohnak ahcun an tta le an bomhnak, Kachin miphun luatnak a hlei ce in Nupawl humhimnak, covo ttha tein tinco khawhnak, nupawl ralkap hna hnawhnak chungin luat in a lamkip tthancho dingin kawl ralkap cu an doh ve.

                                                  KIA nu ralkap

Hi Kurds miphun Nu pawl le Kachin Nu pawl zohtik hna ah uar an cuang taktak, miphun caah nunnak pek an ngamh nu pawl humhimnak le zalennak caah nunnak sungh zong zei ah an rel lo hrimhrim, thil hmanlo cu kan doh hrimhrim a hau, kan doh lo ahcun hmailei kan miphun,zatlang nun, bukip cawlcanghnak le kan nu hawi caah chiatnak tamtuk luakchuak a chuah pi lai, tthanchonak lam a kham peng lai ti an phan caah a si, cucaah Uar an cuanbiknak zawn te cu, Thil hmanlo, uknak hman lo, hruainak hmanlo etc hmanlo cu kan doh hrimhrim a hau si loin a herh, timi lungput an ngeih mi te hi a si.

CNA Nu Ralkap cheukhat

Lainu nih Kurds le KIA Nu pawl Sinin

Chin/lai nu vialte zongnih Kurds le KIA nu ralkap pawl sinin thil tampi i cawn awk um, cucu zeitidah a si ka miphun ka nu hawi, caah humhimnak, covo ttha tein tinco khawhnak, ram le miphun luatnak le zalennak caah ttuanvo ka ngei tihi ruah chih peng ding a si, a si nain zeibantuk lam indah hma ka lak lai timi tukha i thim a hau, ram le miphun, nu hawi pawl humhimnak le luatnak, zalennak caah rianttuan ding cu a phunphun a um lengluang ko, a si nain rianttuan ding vialte cu fimnak le cawnnak lo in a si kho lo cucaah, lainu vialte nih cawnnak lei ah thachuah in raldohnak in si loin chimrelnak in kan ram ah nu humhimnak le zalennak chuahpi khawh i zuam ding a si,cucaah Chin nu vialte nih kurds nu pawl le KIA nupawl bantuk in ram le miphun, nu hawibdawtnak, nu covo caah dirngamnak lungthin i ngeih in fimnak le cawnnak, chimrelnak in kan ram ah Nu pawl humhimnak, zalennak, a chuah khawhnak ding ah ttuanvo kan ngei ti hi lai nu poahpoah nih Kurdish nu le Kachin Nu pawl bang philh lo tein i ruahchih peng dingah a herh mi a si, na cawnnak, na ttuannak, na umnak kip ah ka miphun le ka nu hawi caah zeibantuk luatnak le deihnak dah ka chuahpi khawh lai timi ruah a herh cun adonghnak ah, Laimi nih nu he pa he kan i ngeih ding lungput a simi cu "Thilhman Lo cu Kan Doh a Herh" timi hi a si. Miphun le ramcaah Nu nih ralkap ah a lutmi hi cu upat lo awk le hmaizah lo awk an ttha bak lo.......... 

Keimah

"KEIMAH"

Vun ngaihmanh uh, zai ve tuah ning

keimah timi, atthat lo ning

ka chim hmanhlai, ttha tein ngai hmanh

ai daw ko mi, a huatter hna cuh

airem mi bu, acheu hoi cuh

meeting biachah, a harter cuh

lungrualnak tlang, a chimhdih cuh

hawile kom zong, a tthenter cuh

inchungkhar zong, a buaiter cuh

maivan biaruah, hna a hnawh cuh

mahlawng umnak, a chuahpi cuh

hruaitu  biazong, ngaih duh locuh

mi va nawl zong, a thiam lo cuh

palh ko mi zong, ai thei lo cuh

muichiat zongah, kai dawh ti cuh

ia dawh ah le, mi lamhdih cuh

cheuhbauh nun zong, a ngei lo cuh

bu cheu hrimhrim, a hmang tuk cuh

Democracy zong, a doh hoi cuh

hei tuakhmanh uh, a tthat lo ning mu

mahchunchap ah, hrial khawh har cuh

maw keimah nun, zeitin in hme

kan hlonh khawh lai, ka ti ahhin

ka mang a ang, kan hlonh zongah

na rak kir tthan, thancho dawn tu

maw keimah nun, san na tleih ning

ttumchuk nak ah...

Liam Cia Dawtmi

Liam cia dawtmi

lennak chumtual, lungrawn khuazung

zattial tleih in, leen tti caan kha

ka philh kho lo, ianghlei ka dawt

fingtlang hrawn i, chokhlei senhri

kan ttawh tawn kha, ka ngai hringhran

a tu ahcun, thankong fiakfai

cilio thareng, an hram zawnah

ka lileng ee, bungdim va bang

nang ngeih vangah, ka hram fah hi

ka theih piak law, nai khirh hnga maw

ti ka ruahah, zaan khua ka dei

kan philh kho lo, maw ka dawt aw

kan philh lai lo, na rak ti kha

a tu ahcun, kei ca ttahnak a rak si mu

biangno mithli, hnawh lawng hi maw

kei ka caa i, na chiahtak mi

dawtnak a si, ka tuar kho lo

nang zuun ngeih hi, a faak ko mu

Liamcia dawtmi!!!!!

2015 Thimnak le ka Ruahning

2015 Thimnak le ka Ruahning

Arauh hlan ah kawlram pi hruaitu lutlai thimnak kan phan lai, cucaah kan nih laimi nih zei party ahdah mee kan pek lai, kawlram nelrawn, region/division ah party ngan pahnih a um cucu tulio hruaitu phu, USDP le NLD opposite party an um, cu hna pahnih ahcun nelrawn um mi cu an mee a kal ding a si, kan nih chin mi tlangcung um kan caah Hakha lei in CNDP Falam peng in CPP an i fonh le fonh thlu cang lo fiang fai in ai thei rih lo mi a si, thimnak ahhin thimmi nak in thimtu hi kan fimdeuh a herh mi a si, Hakha le Thantlang peng nih zei party ahdah mee kan peek lai timi hi ruah a hau, atlang piin NLD, USDP le CNDP hi party pathum ahhin kan mee cu a kal te ding khi a si. cucaah a tute in kan ruah a herhmi cu, party ah ma kan dir lai a minung in dah kan thim lai timi hi ruah a herh ngaingai mi a si, a tulio ah laimi nih tihal in kan har bik mi cu tthanchonak a si, cucaah mizei nih dah tthanchonak an tuah khawh bik lai, zei party kan thim hna ahdah mipi kan tthancho lai i kan ram zong a tthancho deuh lai timi khi kan fian cikcek a herh, aluancia kan thimmi hna le an rianttuanning zong zoh chih a hau, zeibantuk tthanchonak dah an tuah khawh, i zeitluk in dah mipi kan caah ttha hnemnak an chuahpi timi zong zoh tthan cikcek ding kan si, a kan uktu bawi lak ah nawl a ngei ve mi va si in ma kan tthanchodeuh lai kaa dang tein vatlei dah timi zong tuak kan hau hnga.

Chin mi chung in Chiandeih party kan um zongah kan caah tthanchonak a tuah kho ding a si ahcun mee kan peek awk a si, Chiandeih party cu kawl party a si ti caan a si tilai lo, a ra lai mi thimnak zongah chiandeih party nih tthutnak an co tthan kolai tikhi a tuhin a thlamlang pah ko cang, hmuh pah khawh a si ko cang, cucaah ah tulio kan dirhmun hi chiandeih he i komh caan kan phan, chiandeih party ah mee kan pek a herh cang, an sin ah kan i tel lo i an mah party chung in tthutnak kan i cuh ve lo ahcun tthanchonak lam a um lai lo, an sin ah le kan i tel lo uktu le an si fawn ttung ahcun, zeitin hmanh in kan caah tthanchonak cu an tuah bal lai lo, kan mah miphun party tein tin kan dir ko rih ahcun, 2011 hrawng in top 20 poorest country ah ai telmi,  Democratic Republic of the Congo, Liberia,  Zimbabwe,  Burundi, Eritrea, Central African Republic, Niger  Sierra Leone, Malawi, Mali, Togo etc.. hrawnghrang level ah kan tlaknak tu a si lai, cucaah Chiandeih party cu Union party a si i, ramhruaitu an si lengmang ko lai cucaah hruaitu lakah ah tel ve in ma tthanchonak kan tuah khawh deuh lai, kan mah lawng in kan peu ah dah, ti hi kan ruah a herh ngaingai mi a si, kawl party a si aipet tiin a huat in kan huat peng ahcun kan caah tthanchonak lam a um lai lo, cucaah USDP chiandeih party ah i fonh in rian kan ttuan khawh deuh lai tikhi ka hmuh ning a si,

Chin Party nih an i tinhmi cu kan miphun i funtomdeuh uhsih, kawlram chung i aa tthekvai dih mi chin miphun fumtom deuh usih, law Buddish biaknak nih a ciah tuk cang mi le lai holh a thiam huaha ti lo mi hna i pehtleihnak tuah ve seh an ti ve ko a si nain kha pawl vialte kha Party ngan chung um zongah tuah khawh dih ding lawng te an si ko, ramri kong zongah Union party chung in tuah hmanh a fawi deuh lehlam, cucaah Chin miphun kan si i chin party cu chin party a si ko, chin party ah mee kan pek ko lai ti nak sawhsawh ngeih lo in a minung, mah hi cu chin mi caah tthanchonak a tuah khawh bak lai, mipi miakmai nak a chuah pi kho tu a si lai timi kha zeibantuk party ah a um hmanh ah thim i zuam hna usih, a party in thim lo in a minung tu zoh in mee thla hna usih, India ah Congress nih teinak a hmu lengmang nain nikum hrawng kumchin hrawng hrang Congress le BJP rianttuan ning an zoh tik ah, tthanchonak a tuah kho deuh mi cu BJP an si, a tulio Prime Minister Modi nih state tampi ah tthanchonak tamlak te a tuah khawh i a mah cu a tu ah prime minister ah a cang ko a ngaingai ti ahcun BJP nak in congress cu minih rak uar deuh mi a si nain, tthanchonak an tuahning aiden caah BJP nih ram an hruai ko, cu bantuk cun tthanchonak kan herh taktak lio a si caah, kan mah party cu kanmah party pei si cu mee kan pek kolai kan ti rih a si ahcun, kan tlaunak a si kolai. A chung in ma rian kan ttuan khawh deuh lai a leng in dah timi ttha tein kan tuakthiam a herh cang....ka biasau timeline lungchuakbia lak ah a saucem si lai hehe.........

LOVE LETTER

I miss the way that we share a kiss

I miss the way that we smile each other

I miss the time that I gave you a piggy back

I miss the way that we walk with hand in hand

I miss the occasion that we live together to dream for our future

I miss the way how we hug each other in tight

I miss the time that we spend together and discussed how we don’t care the flying rumor about us

I care nothing about the world when I lay my head on your thigh

I feel like I was in heaven when you’re reclining on my chest

You made my live meaningful and perfect

You’re the only one that I live for

You’re the one that I can’t live without

You’re the star to me and the light that I followed

You’re the one who can make me happy and cry

You’re the only one who own the key to unlock my heart

You’re the one who never get a chance to be runner up in my life

You’re the one that I care and not even the God from above can separate us,

There’s much more sentences to describe and insert about what you’re in my life but there is no sufficient word and vocabulary at all for me to express, hence I will stop it right here and end up by saying “you’re my all in all” I like you to keep in mind that “I am the one who fight the battle, and risk my life on the frontline to be next to U”.. by KLC

Nawlngaih cu Thluachuah Hmuhnak a Si

Pathian thawngtthabia i Hrawm hna usih

Bible caangthim Genesis 22:1-19, hi cacaang chungah kan hmuhmi cu Pathian nih Abraham a hneksaknak kha a si, i hi nih a kan cawnpiak mi cu abiapi bik in zumhnak kong le nawlngaihnak kha a si, zeitluk in dah Abraham nih Pathian kha a zumh le a nawl a ngaih timi kha hi cathiang chungah fiang khitkhet tein kan hmuh khawh, cu lawng si lo in zeitindah Abraham nih Pathian a zumhnak le a nawl a ngaihnak thawngin thluachuah a hmuh ti kha a si, cubantuk cun kan nih khrihfa nun ahhin nawlngaih le zumhnak tthawn hi zeitluk in dah a rak herh timi le thluachuah kan hmuhnak hrampi a si zia kha langhter khawh ka vun i zuam lai, zumhnak hi cu tampi ka chim lai lo, nawlngaihnak timi lei deuh tu hi ka vun ttial lai.

Nawlngaih cu Thluachuah Hmuhnak a Si

Hi Gen 22 chungah hin vawleicung ah a um bal lo mi nawlngaihnak hmuh khawh a si zeicatiah, Pathian nih Abraham le Sarah cu nanmah nuva hrimhrim nih fapa nan ngeih lai tiah bia a rak kamh hna, cu lio ahcun sarah cu kum 90 a si cang i Abraham cu 100 a si cang a si nain Pathian biakam cu a hung tling i fapa Isaac cu an ngeih, a si nain Pathian nih Abraham nih ka nawl a ngai takma ngai lo dah timi cu a hneksak i bia a kamh mi fapa cu ka pe ka sin ah khanghthawinak rak tuah tiah a fial tik ah Abraham nih el lo tein a fapa le a sin um pathum le khacer/laa he a fapa pathian sin i pek awk ah an umnak hmun Beersheba in Moriah tlang lei ahcun an kal, Beersheba in Moriah tlang hi meng 60 tluk a hlat i nithum chung lamkal a si, ruat hmanh uh tarlei sang i ngeih chun mi fapa pakhat, bia rak kamh mi fapa nih le hei sirih, mah i ka sin ah raithawinak ah ka pe tiah hal tthan, cu hmanh ah innpawng deuh zongah si lo, a hlat taktaknak hmun ah raithawinak vatuah rih, lam nai deuh zongah si lo, zeitluk in dah Abraham caah a har hnga mu, minung nih tuak ahcun mahbantuk nawlngaih dan cu hruhbia ti phu a si, a si nain Abraham nih Pathian nawl cu el lo tein a ngaih peng korih, zei catiah Pathian nih zeithil poah hi ka caah a ttha in khua a khan ko timi a hngalh, cuti cun lamthluanchuak cu khua zaa zaa ruat in an kal Moriah tlang kehram an phak in Abraham nih a sin um pawl cu hika hin kan hngak ulaw raithawinak kan vatuah lai i kan rak kir tthan lai tiah a ti hna

Cuticun tlawmpal an vun kal ah a fapa dawt Isaac nih amah khanghnak ah thinghreu a put bu cun, ka pa raithawinak tuah dingah thing le a cinghrang vialte a um dih ziah khuazeiahdah pathian sin pekding cu a um kun a vun ti chunchap rih zeitluk in dek a pa thinlung a kuai hnga i a hnarno ruh a va ttam hnga, kan mah cio zong kan fapa le khangh thawinak tuahding cu heiruat cio tuah uh, tarlei sang i hrinmi nih hei si, a faak taktak mi harnak a tuar ko, a si nain Abraham nih bawipa cu a zumh i a nawlngaih khawh aizuam peng caah ka fa Bawipa nih khanghthawinak i pek ding cu a khan te kolai tiah a vun ti, tlangpar cu an vun phan i a fa pa cu a ttem i tthingtthang cungah raithawinak tuah a vun timh, Isaac zong nih a pa bia cu a el bak lo i ai ngaih ko, a pa nih nam a vun i thlir bak cun Pathian nih Abraham nih a lungthin dihlak in a nawl a ngaih kha a hmuh tik ah, Isaac cu harnak pe hlah, a vun ti i an pawngah tuukong pakhat khanghthawinak tuahding ah a pek hna, cu ticun pathian sin ahcun khanghthawinak cu an tuah i hringtu a nu Sarah sin ah nuam tein an kil,

Dawtmi nu le pa, u le nau hawi le kom hna nang le kei zong nihin ni ah Pathian nih kan ngaihchiah chawva, kan rumnak le kan fanu kan fapa hi a kan har nemmam lo dakaw kan lungthin dih lak in a nawl kan ngaih le kan zumhnak dihlak hi a mah sin ahchiah ding lawnglawng hi a kan hal mi cu a si ko, Pathian nih a zoh bikmi cu kan lungthin dihlak in zumh le a nawl kan ngai ma ngai lo timi hi a si. kan thinglung in raithawinak tuah kha a kan fial, cucu hi Abraham hneksaknak nihhin piang tein a kan cawnpiak.

Isaac Nun nih Zisuh a Kan hmuhsak

Isaac nun ah a langmi cu Zisuh kha a si, Pathian nih Isaac thih lai cu a siang hrimhrim ve lo caah tukong in a thlen, cu ve bantuk cun Pathian nih a fa le vawlei misual kan sual ruang i thih kha a kan sian lo caah kan lak ah zisuh a runthlah i kan caah a thi cucu John thawngttha 3:16 nih fiang tein a kan chimh, Isaac nih a mah khanghnak caah thinghreu ai put mi nih a langhter mi cu vawlei misual kan caah a thi i a tho tthan mi zisuh nih amah vailamtah aiput in luhruh tlanglei i vailam tah ding i a kal kha a kan chimh, Pathian nih Isaac nunnak cu tukong in a thlen bantuk in zisuh khrih nih kan nunnak cu a thlen i kan mah ai ah a mah tu a thihnak kha a si, cucaah zisuh cu tufono tiah biakamthar nih a ti lengmang nak kha a si, pathian nihhin a kan dawttuk hringhran i a nawlngaih le a sin i kan zumhnak chiah hi a duh bikmi raithawinak a si.

zeiruangah dah pathian nih Abraham cu minung in raithawinak tuah a fial?

Leviticus 20:1-5 chungah kan hmuh mi cu Pathian nih minung in raithawinak tuah cu a huattuk mi a si, sualnak ngantaktak ah a chiah a si nain zeiruangah dah Abraham vial cu minung in raithawinak tuah a fial kun, a ruang cu Pathian nih minung in raithawinak tuah a duh bia a si lo, Abraham nih ka nawl a ngaitaktak maw, a ka zum taktak maw timi a thinlung kha hmuh a duh caah a si, Pathian cu kan thinlung le kan zumhnak a zoh zungzal tu pathian a si, lungthin dihlak in a nawlngaih kha kan caah a kan duhpiak lengmang mi a si, cucaah nihin kan nun ah kan thinlung put hi a ttha maw ttha lo timi i chek lengmang hna usih, kan nunnak a kan khamhtu bia hi kan ngai taktak maw timi dawt mi zumtu nu le pa u le nau hna i chek tthan lengmang hna usih.

Abraham thluachuah hmuhnak

Pathian nih Abraham zumhnak le nawl a ngaihnak a hmuh tik ah, thluachuah a pek, thluachuah hmanh ah thluachuah sunglawi bik a pek cucu tefa thluachuah a si, fa le hi bawipa sin in kan hmuh mi rosung an si timi cu Paul cakuat ah fiang tein hmuh khawh asi,

Biatlangkom

Cucaah dawtmi zumtu hna khrihfa kan nunnak ahhin sertu Pathian nawlngaih hi a rak herhbik mi le Pathian nih a rak kan serhnawhchan a si, kan nih zumtu vialte zong nih kan Pathian Zisuh nawl kan ngaih ahcun kan nunnak ah thluachuah phunphun kan hmu kolai, pakhat le pakhat zong kan nawl i ngai hna usih, chungkhar ah nu le pa nawl ngai hna usih, ramhruaitu nawl ngai hna usih, kan umnak hmunkip cio ah hruaitu, a bukip hruaitu nawl ngai hna usih, pakhat le pakhat kan nawl i ngai hna usih law kan lak ah Khrihdeihnak le hnangamnak le te fa thluachuah chaw le va thluachuah, thluachuah relcawklo kan hmu ko lai, Abraham zong Pathian nawl a ngaih caah thluachuah ahmu Isaac zong a pa nih a kut ke a ttem, thahding in a timhlio zongah a pa bia a el bal lo dai tein a pa nawl a ngaih i a kut ke ttem zongah a pa bia a el lo i ai ngaih ko caah thluachuah a hmu i Pathian nih thihnak in luatnak thluachuah a pek, tefa thluachuah a pek cucaah dawtmi zumtu hna Pathian nawl ngai hna usih nu le pa hruaitu, pakhat le pakhat kan nawl i ngai hna usihlaw vawlei thluachuah van thluachuah kan hmu ko lai, ZEI CA TIAH NAWL NGAIH CU THLUACHUAH HMUHNAK A SI.

Areltu vialte nan cungah Pathian thluachuah zaa tlunghram seh . Amen

ISIS Sining Tlawmpal

ISIS/L Sining Tlawmpal

Tulio vawleicung ah alin sa bikmi thawngpang cu ISIS/L hna i an cawlcanghnak a si, zeidah an rianttuan mi le an i tinhmi, zeibantuk in dah an i sem hodah an lutlai a si khuazei sat ahdah hmun an khuar, ISIS/L cu zeidah si timi tlawmpal in ka ttial ve tuahlai ee

ISIS Sining Tlawmpal

                                             ISIS ralkap

ISIS/L cu a saunak in ttial ahcun Islamic State of Iraq and Syria or Islamic state of Iraq and Levant tikhi a si Levant timi pawl cu Eastern Mediterranean ram, Cyprus, Southern Turkey, Lebanon, Syria, Israel, West Bank, Jordan le Sinai hna hi an si. ISIS/L cu the sunnic salafist ralhrang bu, Islamic Jihadit timi minput in 2013 ah Al-Qaida hrambunh in dirhmi a si, a sinain an rak i semnak cu US nih Iraq a rak tuklio te khan a si cang nain Islamic State biatak tein an aupi cu 2013 lawngin a si. Al-Qaidai hrambunh in an ithok nain Syria Baasar Asad Shia muslim ralkap doh awk ah an kal hnu in an sining an nuning a puarhran tuk caah Al-Qaidai zongnih cun an rem ti hna lo i an i tthen,a ruang cu an kalpi mi policy an duh lo caah a si, an nih nih an kalpi micu Muslim biaknak arak i sem ka i Kalifat timi cawlcanghnak ahkhan kaltthan anduh, a hleiin Middle East i a ummi poah i muslim phung Sharia law/Islamic law timi in ukding tiah an aupi, Democracy an doh, humanitarian Aid pawlzong an doh, Khuazei ah dah hmun an khuarsat ti ahcun a bikin Syria, Iraq le Nichuah laifang (Middle East) chung i a um mi ram pawl ahcun an umdih ngawt ko. 

Zeiruang ahdah a tubantuk hin ISIS hi ral an thawh timi zoh lengmang tik ah a ruangbik cu Iraq PM Nouri Al-Maliki ruangah a si tiah mitampi nih chim a si, amah nih Shia le Sunni bu karlak ah thleidennak tamtuk a tuah caah a si tiah puh cio a si, Iraq cu Shia muslim ram a si bantuk in an PM nih Sunni Muslim kha shia pawl he a thleidentuk hna ruangah hi thil hi a chuak mi a si,  cucaah sunni muslim poah nih cun PM Al-Maliki cu an huat dih i ISIS cu an ttanh dih. kan hnu June thla ah US Secretary of State John Kerry nih a va tlawn hna i PM Al-Maliki cu and mah Iraq cozah, Kurd, sunni Muslim ticun coalition cozah ser in remtein umding in forhfial nain PM Al-Maliki nih a duh ve lo i a tubantuk hin ISIS nih Iraq an rak laknak hi a si, a si nain a tucu US le NATO nih vanral kap in an bomh hna i ISIS hmunhma lak cia mi tam u cu an chuh tthan khawh cang hna.

 An hruaitu ah lubik a min ah Abu Bakr al-Baghdadi ti a si i amin taktak cu (Ibrahim Awwad Ibrahim Ali al-Badri Abu Bakr atinak sullam cu kalifat cawlcangh lio i muslim an lubik a simi min kha abunh ve zau mi a si, atu cu Kalif Ibrahim tiah an auh cang anmah ISIS nihcun, (Kalif timi cu Muslim Invasion period, 7 century in aithok i 19 tiang hrawng muslim nih vawlei lak an timhlio hrawng, Muslim phung in vawlei uk an timhlio hna i an lubik pawl kha an si, an prophet nganbik Muhammed rian achang tu tiah an ruahmi hna a si cucu uknak phung cu Turkish hruaitu Mustafa Kemal Ataturk nih1924 a rak hrawhmi kha a si.) a nih hi Islamic Law in PhD degree a la mi a si, Iraq ralkap ah a rak ummi si nain, terrorist ah aithleng mi a si aruang cu Iraq cu Shia Muslim ram a si caah sunni muslim cheukhat kha Iraq nih a thleiden hna caah terrorist ah a luhnak hi a si, 2005 ah US forces nih Iraq ah thong an rakthlak nain sau a tla lo a chuak colh cun 2006 ah Global terrorist tiah state department of US nih amin an ttial i 2011 ahcun US state department nih vawlei cungah terrorist a duhbik tiin a hmanthlak tiang antar i laksawng ah $10 million tiang a hmanthlak ah an benh, ISIS hruaitu lubik aa achuah cu 2010 in a si. 

                                         ISIS bawizik

ISIS nih hi lamtam ngaiin phaisa bawmhnak an hmu ve, private in siseh a ram in siseh tampi an hmu, private in bawmhnak an hmuhnak bik ram cu Jordan, Syria, le Saudi Arabia in a si, American's Allied timi Qatar, Bahrain, United Arab Emirates le Oman, Gaza, Indonesia te hna an si, a hlei ce in Turkey hi bawmhnak a phunphun an hmuhnak ram a si, Turkey cozah President Erdogan hruaimi nih an ram ah raltuk tinttan cawnnak te hna a onh hna, hriamnam le phaisa lei zong in a bomh mi hna an si, cun ramdang lei zongin ISIS ttanhtu sin in phaisa lei he hriamnam lei he bawmhnak an hmu, Syria ram i Zinan chuahnak hmun an lak i cu zinan cu mendeng te in an zuar i cu ka hrimhrim cu a tomtom in phaisa an hmu, ka dangdang zong a u m len rih. hriamnam lei zongah an tthawng ngaingai ve ti a si a ruangcu Syria le Iraq i an laknak khuapoah poah i ralkap sakhang i hriamnam vialte cu an lak dih i mah lak ahcun US nih hriamnam ttha tiin a ruahmi meithal ttha ttha zong an i tel, sivai ai tel mi hriamnam tiang an ngei ve, cun Turkey nihhin hriamnam lei cun a bawmh tthiamtthiam ve hoi, a si nain a tucu Turkey lei hruaitu zong cu John Kerry nih a len kai lengmang hna caah ISIS ral lei tu ah an i chuah ve cang i lawmhawk pakhat a si. 

Abiapi in an aupi mi cu Islamic law in kan i uk lai i an hruaitu al-Baghdadi cu vawleicung muslim vialte uktu a lubik a si lai ti kha a si cu, cuticun khua khat hnu khuakhat in lak kha an i tim cuahmah, Muslim biaknak bak an au pi tik ahcun, Muslim cheukhat pialsual kan ti hna hngamaw mah pawl nih cun an ttanhtuk ve hoi hna i ramdang um, EU le Asia um muslim cheukhat cu Iraq ahcun an ra riangmang i ISIS cu an bawmh ve hna, an ralkap hi cheuthum ah cheukhat cu ramdang mi an si, US citizen, Australia citizen France hrawng hrang muslim pawl zong tampi an i tel ti a si, an kalpi mi cu kan Pathian Allah ram kan kauhter, Pathian caah ral kan tu ti kha a si, an ralkap an kalh ning hi a rang taktak hoi, June thla hrawng ahcun 15000 le 20000 karlak hrawngin rak tuak a si nain tu ahcun 30000 le 50000 karlak an si lai tiah ruah a si, a ruang cu hngakchia zong ralkap ah an luhter hna, Muslim cheukhat zong cu ISIS ralkap ah na luh lo ahcun kan i thah lai tiah an hro hna, cu tik ahcun thahnak cun ISIS vabawmh zong cu ngamhdeuh cio a si cang caah an milu karhning a ran khunnak hi a si. thah ma na duh deuh ISIS luh an ti cang hna ahcun ISIS thihnak cun nun i ISIS luh cu a duhmi an tamdeuh tuk caah an milu karh a ran taktak hi a si. Mi an hremdan cu, Hawngtan, lungcheh, pumchung i pakhat khat tan kut, ke, ku dong heitiphun, mithahnak video in youtube ahthlah, minung fir riangmang in an chungkhat kha phaisa in rak tlenhter hna, thlanglei Iraq an lak lio ahhin an sin ah aa upmi ralkap zong an thah dih hna, nu an tleihhrem hna i June thla in tutiang ah Iraq ram i nu ISIS tleihhremnak a ton ruang i a mah le mah aithat mi nu hi an tlawm te lo ti a si.

                               ISIS nih Mi an thah hna lio

An i tinhmi cu a bikin kum 5 chungah Middle East ram vialte le Israel, North Africa, Spain, Greece, Pakistan, Georgia, China le Russia ramcheukhat hi Muslim ram ah kan serlai i muslim uknak phung, sharia law/ islamic law in kan i uk ti kha a si, a sinain an ruahnak bang fawite ahcun serkhawh dawh cu an si lai lo a tu hoi hna cu NATO cheukhat le Iraq ke ralkap bawm in an nam ve cang hna i mu, an hruaitu lubik Kalif Ibrahim nih cu heh tiah thawngthanhnak a tuah ve, an party lak i biachimtu an i ngeihmi hna zong nih he tiah thawngthanh an tuah, ra u law pathian Allah ram kan kauhter hna lai, Pathian caah ral kan do hna lai an ti i, caphun kip an chuah le an mah muslim cathiam sang le mirum deuh sin poah ah sawmnak ca an ttial ve len i ramkip um muslim sin ah thawng thanhnak an tuah, Pathian caah raldo ti cun i ruat hna kaw, an rawl ulh thla Ramandan ahhin cun mi kha fak chinchin in an thah hna, nu pawl zong kha Pathian caah nan nun i pe uh an ti hna i, pialsual muslim nu cheukhat cu ISIS ralkap sin ah an taw an va i vahlut le ISIS ralkap he sex an va tuah cucu sex jihadit tiah an ti i muslim nu cheukhat cu pumpek bak in ISIS ralkap sin ah an taw cu an hlut ve hna, a hlu duhlo mizong cu ISIS tapung nihcun inkhat hnu inkhat in an luh hnawhhna i an tleihhrem vial hna cucu nunih an pathian Allah caah an tuahkhawh mi raldonak a si tiah an pom piak hna ve hna. 

Abik in an thiltuah mi cu, an laaknak hmun khua le ram i shia muslim biakin le thlacamnak in tiah ruahmi poah cun bulldozer (ttheng) in an hrawh i an mah sunni muslim bu a si riangmang i ISIS policies a cohlang lo mipawl biakinn vialte cu Bomb in an puah, khrihfa pawl cu biakinn onnak nawl an pe hna lo, an on i an i pumh an hmuh mi hna cu an tleihhna i an thah hna an biakinn an khangh piak hna an laaknak ram le hmun i khrihfa vialte caah thimnak pathum an chuah i cucu, ISIS ah luh, an duh lo ahcun Ngunkhuai tampi liam, mah anduh rih lo ahcun umnak khua, hmun in chuah, an duhlo ahcun an hawngtan tiah an chuah i, khrihfa cheukhat cu an mah sin ah aifonh mi zong an tam lengluang a sinain cheukhat khrihfa mirum cu ngunkhuai pek zong cu a cohlang mi an um ve, nain ISIS khuachia hmuhbak in ahmu i khrih aatleih pengmi hna nih cun Iraq cu le syria ISIS umnak hmun le hma cu an chuahtak i kaa dangdang ah dornak an kawl ve, an kaltak mi an thilri le hlawn vialte cu ISIS ralhrang nih cun an i lakdih, an chuhdih hna, cuticun Iraq khrihfa cu kaa kip lo ah ralzam dirhmun in an um i Pathian an i tleih caah France nih tamlak te a cohlan hna i, an umnak kip i buk an tommi inn cungah hin Zisuh cu bawi a si, deihnak a si, lawmhnak a si tiah an i tar, a sullam cu zeitluk hremnak le temhinnak kan in ko zongah kan bawipa zisuh cu kan hlaw lailo a mah cu kan biakzungzal lai i kan zumh kolai tiah an i tleih ve, Zisuh nih Mathew 5:10 i a chimmi kha biatak tein an i tleih i an zei a poi ve lo. 

Muslim biaknak a lu le taw leh an timh, an i tinh ning te ahcun Saudi Arabia Muslim biaknak center vawlei cung muslim vialte nih hmuh dih cio ding, Allah biakding ah kal hnawh hrimhrim ding hmun tiah an ruah mi Mecca and Medina hmun zong a rauh hlan ah kan lak lai i kan hrawh lo hmanh ah phundang in Allah biak dan kan mer lai an ti, Mecca khua i an prophet Muhammed nih Muslim Bible Quran timi a rak ttialnak hmun Kaaba timi hmunthiang tiah ruahmi lungpi, muhammed rawl a rak ulhnak Gabriel nih Quran a rak au i Muhammed nih a rak ttialnak hmun lungpi zong cu kan hrawhdih lai bomb in kan puah lai an ti, ziah ti ahcun mah kaaba timi lung pi hi Muslim vialte nih kumfachial an va kal i an hnamh tawn, hmunthiang hlim tiah an ruah mi a si caah an hnamh mi a si cucu ISIS lutlai pawl nih siasal biak bantuk a si kaaba timi lungpi biak he ai khat ko an ti caah an duh lo i kan hrawh lai tiah an tinak cu a si.  a si nain a tulio thil umtuning zoh tik ah an chunmang i an manh mi kaaba bomb puah ding le Mecca and medina lakding cu tlamtling khawhdawh an si lo, Vawleicung ram 30 leng nih Iraq cu a herhmi thil poah bawmh ding in an i ready cang i, ISIS chunmang cu tlinkhawh dawh a si ti lo, Iraq ah cun US vanralkap nih an phomh hna Iraq ralkap nih kee in an vun rawt ciammam hna le tulio cu dum ei a hmang mi cawrun dawi in dawi cuahmah ko, Syria ah le Langaak nih thlanthla fa le aa ei sual i thlantlhla nih um thiam lo dawi in an dawi bang vanralkap nih ISIS cu an kah ve hna i khuazei vantaw sawhnak hngal lo in um dawh an si ko cang i lawmhawk ngaingai a si, biaknak bu an si ti ah le an mah muslim hawi le zong an thah hna, ramkher bu an si ti ahle Pathian caah ral kan doh an ti fawn, zei hme an si hnga ISIS hi tiah khua.....................ruah.............ahkhin ............aw LU THET THA MHA, bu an si ti ahhin adik bik ko lai dah

khah a sautuk cang a dikthlir te in ttial ahcun cauk pakhat chuak a si lai cucaah mahvial hin ka ngawl lai i nan lungpian deuhlo nak le ka chimduh mi ka khen khawhdeuh lonak zawn tu cu cuzawn te kha zawn te kha fiangdeuh in kan ttialpiak tthan te ti khawh ka si, ISIS kong a tlangpi deuh in ttial mi a si caah tlamtling lonak tampi kolai check tthannak ka tuah lo caah laica palh mi le biatlang hmanlo a tam emem hoi kolai dah....tlamtlin lonak le chanbaunak vialte cu nan theithiam kolai dah,, a karlak ah tlawmpal theih ttha tiah ka ruahmi a um si le ka vun chap tthan te lai.  

Note. hi capar cu Dr. Stanton, ttialmi A FIERCE SWORD in the MIDDLE EAST, July, 2014 timi chung in le Middle East thawngzamh nak ALjazeera le Washington post, Nytimes, timesofIndia,yahoo le thawngzamhnak website dangdang zohchih in ttialmi a si, a bikin laknak hrampi cu Dr. Stanton, A FIERCE SWORD in the MIDDLE EAST, July, 2014 chung in a si,,