Kawilian Le Suisui Dawtnak Tuanbia Part I

Kawilian Le Suisui Dawtnak Tuanbia Part I

November thlathok kaa ahcun lailei tlangval pawl cu biatak tein an i manh lo lio a si tuchan mitamdeuh hmandan cun an Busy lio pi a si, Sattil nih lei le lo lei ah biatak tein an pawt cuahmah lio a si, biatak tein cawngh le hngah an herh caan si kaw kawilian zong cu manh lo ngai in nifachial jean bawngbi tawi a ttat ngaicang mi, commando keden a hnawm ngaimi, chuncaw kennak hangkaw le hrihrual he naa cawngh ahcun phong lei ah aa thawh ve tawn, facang aah cu zaadeng cang kaw, muidawh, samthlai rem, hmaithlak aa rem ngai mi le a mit tthuro mit bang ttial ttha taktak in a ttial mi Suisui zong cu a umnak Khuapi in a nu le pa facangaah nak an kal tik ah innlei rian ttuan, rawlchuan tikhin tal ka tuahpiak ve hna lai tiah semnak lungrawn khua ahcun arak tlungve, 

suisui

Suisui a tlung ti cu Kawilian nih a hei theih ve tikah zaanlei naa a cawnghnak a tlun i ai kholh khawh cang ka te cun Suisui chawnh ahcun, D2 Jean pioh le Maldini pa-hnat, T-Shirt ttialmi bantawi te he a va i thawh , Muidawh, mittial tha Suisui cu tuan ah khua a rak phan cang i dawr khan chungah dawrthil ai rem lo mi tete zong a rak remh pah lio khi a si, Kawilian nihcun Suisui na tlungma, na fel ko ee tlunni bak ah dawr hna na vun hngah manh ko a hei ti, Suisui nih, eh!!, fel si lo hi aa rem lo mi tete ka hei remh i si um sawh nakcun tiah a hei leh, Kawilian nih thiamter ngai khin mit i aa rem lo mi le tuah a hau mi tuah hi dakaw fel kan ti lengmang mi cu a si ko cuh a hei ti an pahnih cun an i nih veve, bia tam hmanh ruah manh loin zaanriah ei a vun za i Kawilian cu zaanriah ei ah inn lei a heipanh ve Suisui zong a dawr cu a khar i innchung lei ah alut.

Cuticun suisui zong a phanh zan a si caah ih a duh lai tiah kawilian nih cun len a duh ngai nain len lo tein a um, Khua cu a hung dei Kawilian cu nidang tawn bang naa cawnghnak lei ahcun athawh, chun nitlak, Suisui kong lawng cu ruat cang kaw, a naa cawngh minih mi lo an ei hmanh thei lo in a um, khua a zoh zongah a hmuh khawh mi cu Suisui muithlam lawnglawng kha a si, zeitik ahdah ni a tlak lai i naa hren a zaat lai timi lawng khua aruat, duhnak bia a chimh hlan ah thlangval dang nih an ka chimh kanh lai ti rumro cu a phang ai, a mithlam, a ruahnak, a hnathlam ah Suisui muithlam le aw le aan lawng kha ai zel ai,

suisui

Suisui nih le soi awk um lo mittial ttha, hatian rem, samthlai rem, hmaithlak ttha si ve tik ah lai khal tlangval nih cun uar dih hna kaw mui-hlan in zaanttim 1:00 AM tiang an to hnawh cio, kawilian nih le chunnitlak naa a cawnghnak in a tlun i ai kholh ttawl tik ahcun Suisui te in cu tlangval rual cu khat dih cang hna, ka tthu ve ko seh a ti ahle chun i naa a cawnghnak le ramlak i a chawhvaihnak nih runh kaw tuan te ah a mit ku lengmang ve i,a tlangval hawi tthut can hmanh a tthu kho lo, cucaah Suisui cu ka duh lo ah a ttha kolai, kei rianttuan le khuate naa cong, hoi bang thilttha ka ngei kho fawn lo i tuan ah le lennak caan ka ngei fawn lo caah Suisui hi ka phu tawk lo a si caah a si ko lai tiin lungdong hacang rial in hnulei ah kir ai tim, Suisui zong cu zaankhat te lawng cu a len i zaan dang cu ka leng ti lai lo a ti cang, sihmanhsehlaw Suisui a tleihchannak le a lungchung tein a duhnak, a mitsir in a vennak cu a nunah a tlau kho hrimhrim lo, a zeikhom si ah caan le sining nih a ka pee ve lo timi a hei ruah tik ahcun philh khawh lo zongah tuah awk dang a um ti lo cu ta.

suisui a hnulei in

Sihmanhsehlaw duhnak kan timi cu a mit a caw an ti bang Suisui nihcun kawilian cu a rak hmuh kaa tein a lungthin a rak pek ve mi teh a si lai, a lung in a rak tleihchan ve caah teh a si hnga, valttha lukingh in thimkhawhnak caan ttha a ngeih lio ah, a pawng i a to hnawhmi valdawh tampi lak ah a lung umhin lo in zanfachial le nifachial a lung cu kawilian sin cingcing ah a rak phan i um ve ttheu rua teh aw, kawilian a lungchung te in a hei tleihchannak le a duhdawtnak kha ai uam kho ve ti lo i a hawinu, hlawnhlawn sin ah ziah kawilian hi khuazeidah zaan ah a len tawn hnga, a hmuh zong ka hmu bal ti lo, ziah a ka len ve hnga lo timi a rak phaipi tawn.

Nu ve zong cu bia an theih mi cu uam kho hna hlah kaw hlawnhlawn nihcun zarh pini i kawilian a mah lawngpi ai chawhvah ko kha a hei hmuh, kawilian ra ta hmanh biachimh ding kan ngei, a ti i zei kodah si hnga ma cu tiah lau ngai in kawilian nihcun zeidah si hlawnhlawn chimh na ka duhmi cu a hei ti, hlawnhlawn nihcun vei da kaw.. kawilian nihcun zeidah chim zok a hei ti i, ziah Suisui khi na len bal ve lo, a ka len bal ve hnga lo, khuazei ahdah zaan ah len tawn, Dl hna a ngei ma tiah a ka ticuh, a mithmai le a biachim nih nangmah an duhdawtnak alanghter ko, tuchan holh cun an seihwinsa sa ko tikhi a hei chimh i, kawilian cu a nuamhtuk ahhin biachim awk hmanh a thei lo, cetkeuh lio i tlangfang pung sawmruk ngeihnak in ai lawmdeuh, si cun hlawnhlawn.......sau nawn arauh hnu ah,, Suisui cu tuzan bak ka leng lai a vun ti,

Nika cu tlangpal in a liamziahmah, kawilian cu khua muih lai lawng hngak in umtunak thei lo in a um, khua cu a vung mui, zanriah ei hmanh hawi sinah ei lo in amah lawng cum sapherh pakhat a pawh i ai rawh duak i a ei chung, a nu nih zei ti hme na timh hawi sin ah ei ko lo in ka fa a hei ti zongah ka nu tuzan cu rianherh taktak ka ngei tiah a nu zong cu a hei ti i a kam hmanh tthatthi in fawhmanh hlan ah Suisui te in lei cu a hei panh, a hlan tawn bang Suisui te inn ah tlangval cu, valcang, vallai, in valno tiang an rak tling dih hoi, a si nain kawilian cu hlawnhlawn bia nih mah zan cu a lung a hun sauter i, hna a rak ngamter ngaingai cang, mitkuh le retheih nih a den ngai ko nain a mittial tthat hmanh biachimnak nih a tlinh khawh lo mi, a hatian rem hmanh mi nih hmu cio hnasehlaw a ttha tiah ruahmi Suisui sin i duhdawtnak bia phuan ding ai timh mi nih a retheih le a thabat zong a philhter dih. a Vun tlaideuh ziahmah tlangval cheukhat cu zaantlai nih a tlarhkhonh hna i an ttin uahmah hna, cheukhat Suisui dawhnak le thinlung, umtu hoihar nih ttin kholo in a thlauh mi hna zong an um ve, kawilian tucu mi ttin dih hlanlo tiang hrimhrim um ding timh cia te in a rat caah ai tinhmi tlinter hlan cu a lungah mitkuh le kuhlo zong umti lo, Suisui mirh le aw aan nih a lung cu sumsuk in a suk.

Tlailam cu a hun penh ziahmah tlangval dang vialte zong cu an ttin dih cang, tap chak tthumi Kawilian zong cu a vun tho i ttin hlah maw aazarh ve tiah Suisui nih lungdong ngai le thinphang ngai in a hei zoh ahkhin  tthutnak remh a vun i timh tu a si ai Suisui cu a vun mirh tthan. Kawilian nihcun ngampah zanhpah khin a thaw huuuuuuu tiah a vun chuah hnu aw nem ngai in "Sui" na pawngah ka rak tthu lai ngah ma a hei ti, Suisui zongnih cun kawilian cu a lungchung in a rak ham hmasa mi asi tik ah a pawng i biachim le um tu hi a thiam ve hrimhrim lo a si nain zan king cu sicang, anmah pahnih dah ti lo cu khuachung ah zei aw aan hmanh an thei ti lo, pawkhlat lei i khuangtirit awnh dah ti lo cu a king taktak, Suisui nihcun "Lian" nangmah nawl ta na tthut duh cun ngah ko rak tthu ko a hei ti ve, Kawilian thinlung cu nuamhnak in a khat.

Kawilian hmanh nih biathok hmasa loin Suisui nih naa uahtuk, len zong na ka duh lo a vun ti colh ko ai, kawilian nih zeitindah ka phisin lai timi bia cu a lukheuh pah khin resenthei in a ruat, zeidang cu thei ti hlah kaw chun i a naa cawnghnak kong tu cu a hei chimh, "Sui" len kan duhtuk ko nain chun nitlak naa ka cawnghnak nilin le khua al lak i ka vahvaihnak ah zaan ah a ka runhtuk tawn i len kan duh tuk ko, nain kan leng kho bal lo a hei ti, sihmanhsehlaw Suisui caah a phi hman zong si lem lo nain Suisui nih mah kong theih kha cu a seihwinsa ve tilo ,i si ma na ba tuk lai cu ta ti lawng in a hei ti cang, 

kawilian cu zeitindah bia ka thok lai  a tinak ahhin a kam a seh, a lu a kheuh i zeitin biahram ka thok lai ti a hngal kho bak lo, A hnu parawt ah "Sui" zeitik dah nan kir te lai, saupi um law ttha hnga, na kal colh cun kan ngaituk lai ka celh bak lai lo tiah bia a vun thok, a si nain mah hlan ah Suisui a rak len bal lo tik ah Suisui nihcun ngeh "Lian" mahvialte ka um chung a len zong na ka len bal ttung lo a hei ti, kha-khan cun biachim awk cu a pit chin lengmang cang, i a lungthin chungah zeibia hmanh chuahti lo in, Sui tiah lachonnak nemdeuh in a hei auh i Suisui nih zeidah "Lian" a vun ti, Kan uar bak si tiah kawilian nihcun thar lengmang in a vun chimh Suisui nihcun Uar lawng ma na ka uar a vun ti, kawilian nih cun aw sory a duh in kan duh tiah kan uar ti a vun chimh khawh cun ngamhsan in ai la cang i a vun thlen tthan, saunawn an daih..............hnu ah Sui zeitin na ruah, kan duhnak hi na ka cohlang kho lai ma tiah a vun nolh, Suisui nihcun Lian ruahnak caan ka pe ta a heiti, kawilian ve zong cu ka chim cang ko pat tiah a phi hal cu a cak taktak ve hoi i kan duh a ti cang hnucun umthiam lo in a phi a hal lawng cu a rian cang, a phi hal lei ahcun kawilian cu biathiam in ai la ciammam i Suisui nih a zeiti tuah awk a thei ti lo, kawilian cu a duh le a duh bak ve fawn cucaah a timi cu LIAN NANGMAH HLAN AH KEIMAH NIH KA RAK IN DUH CANG EH a vunti ko ai.......kawilian cu a nuamhtuk ahhin biazong chim kho lo holh zong holh kho lo in sau lak te a um hnu ah SUI KAI LAWMTUK vawlei cung i ka rak chuah hnawhchan hi nangmah na si ko, a heiti i na ka duhdawtnak langhternak caah ka KISS ta a heiti Suisui PUK a ti hnu ah  a tlaituk hringhran cang i dawtnak biazai phaitti manh hlan ah kawilian cu nuamh taktak in thaizing naa cawnghnak i kaltthan ding zong philh dih in inn lei ttin a vun i thawh.. to be continue..

Suisui share a kiss with Kawilian

Miphun a Lian Nganter Tu cu Dinnak a Si

Miphun a Lianngan tertu cu DINNAK a Si.

Vawleicung miphun le Biaknak vialte nih Phungthlukbia an ngeihcio a si nain kei ka caah cun hi , Khrihfa mi hna caah Pathian nih Siangpahrang Solomon hmang in a kan pek mi phungthlukbia MIPHUN A LIANNGAN TERTU CU DINNAK A SI timi phungthluk nakin a hmandeuh mi le a cang taktak mi phungthluk hi a um lo, cucaah dinnak kan timi hi zeidah a si, hi khuazei in dah aathok timi le zeitindah dinnak nih miphun cu a liannganter ning a si, bible chung in kan hmuh khawh mi dinnak a ttanhmi minung le vawlei cung level in dinnak a ttanh i miphun a lianngantertu kan zoh hmasa lai.

Dinnak kan timi hi Biaknak phun zakip nih theological term and important terminology ah an chiah dihmi si, Hindu philosopher and father of Independent of India Nation Mahatama Gandhi lebang nihcun Pathian kan ti lengmang mi cu Dinnak hi a si ko a ti OT nih Dinnak timi cu tsadiyq= righteous, adingmi or Pathian nawlbia ttha tein a zulmi le Yashar = upright, straight in a leh chel righteous in a leh chel a si, yashar nih a langhter mi cu dinnak lam a zulmi, one who walk in a straight line tikhi a sawh duh laiholh cun, a dingmi, dinter khi a sawhduh, dinnak lam a zulmi ti kha a sawhduh, Greek in ttialmi NT nih a hman ning ahcun Dikoias ti a si a sullam cu mirang in righteous kha a si ko, cucu NT ah hmun zahnih lengah hmuh khawh a si, cucu mirang nih righteous/ness, rectitude, fairness, justice, upright, straight tizong in an hman i an sullam le a hmannak tlawm tete cu an i dang sihmanhsehlaw lai holhcun, an dihlak nawn hin dinnak, a dingmi, miding, dinnak a ttanhmi tiah kan leh ahcun kan palh tuk lailo dah, dang tampi zong ttial khawh a si lengluang ko hnga.

Joseph Dinnak le Israel Miphun Luatnak

Joseph nunnak kan zoh a si ahcun a nih cu a pa fadawt a si i a pa nih a dawtnak kha unau dang nakin a dawt deuh ti kha a  u le dang nih an hmuh tikah Egypt Sumdawng sin ah an zuar i Ezypt ram a phanh tik zongah a dikmi a lungthin le dinnak a tleihchan caah Ezypt ram siang pahrang ngun keng le siangpahrang dirhmun tiang a dir khawh kha kan hmuh i a u nau le a rammi mangttam, le pawttam a tuar cuahmah mi zong a khamh hna ti kha kan hmuh khawh, Joseph a nunnak lamtluanter tu le Israel miphun a liannganternak hi a chung i a ummi a lungthin dinnak ruangah a si ti uhsihlaw kan hmaan dih lo hmanh ah kan palh tuk lai lo dah, Israel mi mangttam in luatternak le sal in luatternak kongzong fiang tein zoh tik ah Joseph dinnak thawng in a si ti khawh a si.

Kawlram Hruaitu Miding Tiah Ruahmi

kawlram mizapi nih miding le Hruaitu ttha tiah ruahmi hi Dobama Asiayone chan in thok usihlaw an tam lengluang ko hnga, thakhin mya, thakhin nu, Dedoh Ubachu, Thakhin Thein Pe etc an tam lengluang hnga, cu lak ah kawlralkap dirhtu tiah ruahmi Boeyoke AungSan tluk in dinnak le deihnak a duh i miphun caah rian aattuan mi hi an um theng hnga lo amah thawngin Burma Independent, mahte ai uk mi ram kan phanhnak zong a si ti uhsihlaw kan palh bang hmanh ah a tamdeuh cu kan hman ko hnga, amah hruainak thawngin Chin miphun kawlram kan i fonh zong cu a si, a sianginn kainak in Ramhruaitu dirhmun a dir tiang miding a sinak kha tampi hmuh khawh a si, i kawlmi hruaitu lakah dinnak a ttanh bik mi le thilhman a ttanhbik, a si ruangah kawlram zong vawlei pumpi nih an theihnak, an upatnak le an philhkhawh lonak hi a si ti usihlaw, kan palh lem hnga lo, 

India Hruaitu Gandhi 

Gandhi cu an ram mirang uklio ah mirang kha deihnak he chawnh a duh zungzal i biaruahnak in India mizapi luatnak kha a teltum lengmang mi a si, non-violence in deihnak ser a duh i dinnak cu Pathian a si a ti tu a si, amah nih a hmanmi le dinnak a ttanhnak thawngin India ram pumpi Independence a hmuhpi tu hna a si i, nihin ni tiangah a chuahni le a kal pimi non-violence idea, amah hruainak thawngin hmuhmi independence day, le a chuahni hmanh nihin ni ah India mipi nih national days ah chiah mi a si i an lawmh piak rih, India independence an hmuhnak hi Gandhi nih dinnak a ttanhnak thawngin a si ti usihlaw kan palh thlu lo hrimhrim lai.

India Ram ATM Bank le Miding Pathum

Ka umnak state Telengana ah Voikhat cu college a kai liomi tlangval pathum nih an hawipa birthday laksawng pek ding thilri cawknak ah ti'in thilri cawk duh ah ATM ah Phaisa/tangka Rs. 300 va hlam awk ah an kal i, ATM phaisa thohnak hmun an va phak tik ah ATM phasai chiahnak kuang pi a bauh ko kha an hmuh, phaisa India in Rs 25 lakh/ting 25 kha an hmuh, a si nain cu phaisa an hmuhmi cu an lungthin i a ummi dinnak thawng in cu phaisa cu lak hin lo in India Police sin ah report an pek tik ah police nih ATM cu an chek i phaisa tlingte in an hmuh cu tik ah cu ATM a bauh i phaisa a tomtom i a hmu ko nain mah pumpak ca hman awk ah ai lak lo tu tlangval pathum cu India zapi theih in minthatnak an pek hna, an state thawngthanh ca le media hme deuh phun kip le biaknak bu kip nih mintthatnak le thangtthatnak roca an pek hna i an min a ttha, an mah min lawng si loin an chuah kehnak hmun state min an tthatter, cu hna thawngpang nih a hei kan cawnpiak mi cu dinnak hi mah pumpak nun a lian ngantertu lawng si loin miphun le chuahkehnak khua le tlang/Ram min tiang a lianngan tertu hrimhrim a si ti kha a si.

Zisuh le Dinnak

Khrihfa nih kan biak i a cawnpiaknak kan zulh i amah lawng mi khamtu le vawlei misual vialte a mah thisen thawngin sualnak sal chung in luatnak le a mahzumhnak thawng le a vel thawng lawnglawng in thlarau khamhnak, duddim nunnak kan hmu ti i kan zumhmi/ruah khrihfa phung le zumhnak adirhtu Zisuh khrihnih  a kan cawnpiak mi cu"the truth shall make you free" ti kha a si, a hei chim duhmi cu zei dirhmun kan phanh, thongtla ding, hremding harnak phunphun chungin luatnak kan hmuhnak ding cu "Dinnak kha a si a ti duhnak kha si" cu nih a langhter mi cu Dinnak hi Khrihfa mi kan zumhnak a muru le khamhnak a kan cotertu pakhat a rak si timi kha a si.

Nihin Ni ah Laimi Nih Dinnak kan Ttanh Maw?

Nihin ni ah Laimi nih dinnnak kan ttanh maw ti hi pumpak cio i tuak awk ah a ttha ngai tiah ka ruah, miphun a liannganter tu cu dinnak a si tiah kan Bible nih a kan cawnpiak mi hi kan co hlang kho ma, kan co hlan ahcun dinnak cu teh kan tuah i kan i nun pi kho taktak maw timi hi i ruat tthan cio hna usih ti hi ka duh, Dinnak hi nihhin ni ah miphun a liannganter a si tihi teh kan nunnak ah kan hmu kho cio maw, keimah hi ka ding maw ka sual dah ti zong i ruat hna usih ti ka duh ngaingai.

Dinnak Kan timi cu Khuazei ahdah a um?

Dinnak kan timi hi khuazei dah a um hnga, Democracy uknak ram ah dinnak hi hmuh khawh a si hlei ma, ramkip uktu hi dinnak bak ttanh in mah pumpak miaknak ruat lo in dinnak taktak ah a dir mi an um kho ma, mibu ah teh dinnak hi kan hmu kho ma, Biaknak ah teh dinnak bak in khua khan i pastor te nih dinnak bak in rian an ttuan ko ti hi teh kan hmu kho ma, kan zatlang nun ah dinnak a lengma, pumpak nun ah teh dinnak hi kan ngei ma, dinnak kan timi cu khuazei ah dah a um hmasa a herh, dinnak hi zeika hmun ahdah kan langhter awk a si, dinnak a hrampi hi teh khuazei in dah ai thok, timi hi ruah ngaingai a hau. Dinnak kan timi cu pumpak thinlung le ruahnak in ai thok mi a si, pumpak cio kan nun ah dinnak le biadik ttanhnak a um ahcun khuatlang nun, mi bu nun, rampi uknak le hruainak ah dinnak a um kho mi a si.

Biadonghnak

Cucaah Dinnak kan timi hi pumpak nun in ai thok a hau, pumpak nun ah dinnak nih hram a thlak ahcun miphun nun ah dinnak a karh lai, cu dinnak cu kan phaknak hmun le hma, ram le tlang ah kan i tleihpeng a si ahcun, kan i tleihmi i kan tuahmi dinnak nihcun miphun mintthatnak le pumpak mintthatnak a hmuh lai i, cu dinnak kan tuahmi nihcun pumpak nun le miphun a liannganter lai, kawl phungthluk ah kan hmuhmi cu, Nga pakhat a thumi nih ngaa-zaapi a thut pi ti kha a si cu bantuk cun laimi Pakhat nih Dinnak kan tuah thawngin lai miphun a liannganter khawh i sualnak pakhat thawngin laimi phun min le peng le tlang min a chiater khawh, cucaah laimi nih kan miphun le ram/ peng le tlang min liannganter kan duh a si ahcun kan umnak hmun le hma kip ah dinnak he kan nun i kan tthan a herh, kan miphun sinak kha dinnak in kan langhter cio a herh i kan luatnak zong dinnak in kan kawl a herh, kan pawcawmnak zong dinnak in kan kawl a hau, dinnak he hmai kan nor ahcun kan miphun kan tthang cho lai zei catiah "Miphun A Lian Nganter tu Cu Dinnak a si".

Nang Zuunngaih Ah

"Nang Zuunngaih-ah"

Ttuan zaang tlunglo, hngilh thinthilo

na kong ttheu cu, ka ruat ttheu tawn

cu ngai tluangdang, li len fah cu

an chim bungdim, lileng va ko

ka hluan ai mu, zuunngaih vaangah

zei caantiang hme, na zuunngaih hi

ka tuar rih lai, a lang lo mi 

tlang zaa den in

Zaan mang ahcun, ka ton tawn i 

lungduh biazaa, kan phaitti tawn

ka vun i hlau, khuahoi zawnah

rinawn chantling, cung i kei lawng

ka si ko khi, dahngai a faak

ka ti khun ee

Va bang zuanthiam, tal sining law

dawtmi sin ah, ka zuang diam hnga

a reikiangah, kai fu hnga i

lungduh biazai, ka phaipi hnga

an chim khuatlang, lunglen fah hi

atu ceo pei, maw ka in tiah

Maw zuunngaih fah ka tuar khawh lo cu.

Pastor Daithlang

Pastor Daithlang

Voikhat cu Pastor Zen Dul kha a church member chungin hngakchia, bawhte thlacampiak awk a ngeih caah hngakchia le a nu kha hmai ah rak chuak tuah uh tiah a vun auh hna, bible cu a vun rel a dih in thlacam hna uhsih tiah a vun ti i a mit a chimh hlan ah hngakchia lu cung ah a kut chiah hmasa lo in a mit a vun chimh hnu ah hngachia lu cu a dah in a hei dah i hngakchia lu cu kheng ti lo in a nu hnuk tu cu a muai pah khin a hmeh i thla cu a hei camh, a cam mi cu, bawipa hi hngakchia te hi lu nun ngandamnak pe kosawh, fimnak he tthanter kosawh a lu te zong a nemtuk le can-hah-ter deuh kosawh, cu lo ahcun a tlukrilh sualah aa khonden a fawi tuk rumro lai tiah thla kan cam a hei ti i a kut cu duhsah tein a hei lak cu hngakchia lu si hin lo in a nu hnuk tu a rak si ko ai,,, a kut lak cu a hnuartuk caah midang zongnih cun an hmuh dih i Chairman pa nih kan pastor pa hi tipil a in lio ah a kut hi ti ah a hnim chih rua lo a kut long in tipil pek tthan a hau lai a heiti chapbei rih.. lohtlau...

Minung nih Daihnak Kan Herh

Daihnak Sullam le Aa Thoknak

Daihnak kan timi term and  root word kan zoh hmasa a si ahcun, Sephardic Hebrew/ Israeli Hebrew holh in Shalom ti a si i a sullam cu, daihnak, remnak, tlamtlinnak, hlawhtlinnak zong khi a sawhduh, cun khat lei cu i chawnhbiaknak ca zongah an hman hello, damtein timi laimi nih kan hman tawnmi bantuk khin hman a si ve, cucu Hebrew shalom cu Greek nih an leh tik ah Eirene and ti i a sullam cu tlamtlinnak, hnahnawhnak chungin luatnak, daitein khuasak kha a sullam ah an bunh ve, Greek Eirene kha Latin holh in an leh ve tik ah Pax an ti ve latin holh in "Pax, as in pax vobiscum " ti ahcun peace be upon/unto you, hnangam lungdaihnak na cungah tlungkoseh tinak khi a si, i Greek Eirene he a sullam cu an i khat ko, a si nain pax hi pacification i a hram si ti khawh zong a si, pax is the root word for the pacific/pacification, cu nih sullam a ngeihmi cu Daihnak va ser, a buaimi chungkhar, ram, mibu sinah remnak vatuah, phundang in chim ahcun a ttap mi kha va ngamter phun khi a chimduh mi a si, Arabic nih salaam an ti, Syriac-Assyrian nih Shlama, ramkip nih an mah holh in an i ngeihcio mi a si caah a ramkip ngeihmi le hmannak cu kan lenhtak rih lai i zeitindah english nih hman hram a thok timi lei ah

Symbol of Peace

Mirang nih Peace an ti i cucu peace i a hram root word, aa thoknak taktak cu Anglo-French holh Pes, le Old French holh Pais in a si cucu Pes le Pais cu zabu 11 hrawngah French nih Latin Pax kha an leh i an hman mi a si i a sullam an putter mi cu, daihnak, remnak, lungrualnak, lungtlinnak, tlukruannak tein nunnak, ral um lonak te i khuasak, lungthin hnangam tein um, ttihphannak chung in luat timi pawl kha a si, cucu Pes le Pais cu English in zabu 13  hrawngah peace tiah hman hram an rak thok ve i a sullam cu a cunglei French nih an putter mi pawl he khin aa khat dih ko caah mirang peace sullam cu kan ngawl rih lai i zeitindah Peace Daihnak cu kan kawl ning a si le kan tinco khawh lai i kan ser lai timi lei ah

Dove as a symbol of Peace and Joy

Minung nih Daihnak Kan Herh 

Vwleicung miphun kip le Ram zaakip, vawleicung i a nung mi vialte saram le zu le va tiang nih Daihnak cu duhdih a si. saram nih daihnak an duh kong cu kan lenhtak lai i minung nih kan duhnak lei tu ah vun mer ning law, minung nih daihnak hi a phunphun in kan kawl, United Nation an dirhnak sullam zong daihnak ruah ah a si vawlei cungah zeitindah daihnak kan lenter khawh lai tiah tinhmi ngei in dirhmi a si, cubantuk cun WCC an dirhnak zong daihnak zeitindah kan serkhawh lai timi ruahnak he dirh mi an si, vawilei cung NGO vialte zong zeitindah mipi caah daihnak kan ser khawh lai tiah tinhmi ngei cio in rianttuan cio a si, ram pakhat ah Party tawr le cheng an umnak a ruang zong, a ho dah daihnak a ser kho deuhlai, mipi caah san a tlai deuh lai, a ttha hnemdeuh lai timi ruahnak le tinhmi ngei bu in party dirh cionak a si, kawlram tlangcung mi vialte ral an thawhnak aruang zong daihnak, zalennak hmuh ruah ah a si ko, vawleicung pinih Democracy uknak an aupi cuahmah mi zong ram chungah daihnak leng seh, rammi nih daihnak hmu hnaseh ti ruah ah asi, rian kan ttuanmi, ramdang kan kalmi, kan lothlawh kan cacawn mi zong hi daihnak hmuhruah ah a si, cucaah minung nunnak ah daihnak tluk in a biapi mi hi a um lo, minung kan nun hnawhchan hi daihnak a si ko, ti hal in kan hal micu daihnak, kan kawlcuah mah mi cu daihnak, ti bang kan hal thluahmah rih ding cu daihnak, rawlbang kan ttam hniangmang rihding zong daihnak cucaah vawleicung level in daihnak kan ser lai timi lei ah i thawn tuah usih.

Zeitindah Daihnak Kan Serlai

Dr. Hung Kun, a Professor of Ecumenical Theology and President of the Foundation for a Global Ethic nih a chimmi ka lung tling ngaimi cu hihi a si "Biaknak bu karlak ah remdaihnak a um hmasa lo ahcun zeitik hmanhah vawleicung ah daihnak le remnak a um lai lo, cun biaknak bu karlak ah khuakhan lairel ttinak, tonbiaruahnak (interfaith, interpath, interbelief, transbelief dialogue,) a um lo ahcun zeitik hmanh ah biaknak le biaknak karlak ah remdaihnak a um lai lo" (There will be no peace among the nations without peace among the religions. There will be no peace among the religions without dialogue among the religions") hi caption te hi a hmantuk ka ti, Ram pakhat ah zeitluk hmanh in cozah ttha koseh, rammi caah duhchung in bawmhnak pe ko seh hmanseh, rammi caah daihnak, rammi khuasak nakah hlawhtlinnak phunphun tuah ko hmansehlaw biaknak le biaknak karlak ah remdaihnak, i hmuhthiamnak, i theihthiamnak biaknak pakhat le pakhat upat hmaizahnak a um lo ahcun rampi daihnak le remnak taktak a um kho lai lo, cucaah rampi daihnak a thlurtung pakhat cu interfaith dialogue hi a si, biaknak thleidannak, religious discrimination a um ruangah vawleicung ralhrang nganbik nawn a si mi ISIS zong an chuahnak a si. 

the symbol of Differences Relgion

Daihnak le remnak kan duh ahcun Rampi cozah nih a ukmi ram kha secular state policy in a kalpi a hau, zeibiaknak hmanh a ngan ah chiah lo, cozah pinih biaknak kongah ai thlak lo kha a hau, freedom of belief and faith, religious kha biatak tein a onh a hau, zei catiah rampi cozah nih biaknak ah ai thlak i biaknak bu pakhat kha a dang nak in a ttanh hlei ahcun a dang biaknak bu nih an duh lai lo i biaelnak, buainak, cozah pi huatnak le biaknak le biaknak karlak buainak,i tuk le i thah tiang hmanh achuah pi lengmang lai cucaah rampi daihnak ahcun a cozah nih biaknak kongah an i thlak lo a hau i remdaihnak a duhmi mipi nih interfaith dialogue tuah a hau, biaknak remdaihnak kan duh ahcun  midang biaknak le an zumhning an kalpi ning vanram an hmunhning etc..kha kan theih a hau i kan biaknak zong kha an theih ve a herh cucu kan biaknak cio kan i theih i kan i hmaizah piak khawhnak ahcun biaknak pehtlainak, interbelief relation kongah biatak tein seminar, workshop a phunphun tuah in biaknak phunkip chung in cathiamsang le religious expert kha resourses ah lak hna in mah le biaknak kong cio kha chimhfian le i ngaihpiak cio  a herh, cuticun biaknak dang he daihnak ser a herh. a ho hmanh kha force convert tuah phung a si lo, biaknak kan timi cu pumpak nun ah a um mi a si i a mikip nih a biaknak kongah duh thimnak nawl an ngei, ho hmanh nih midang kha vanram kainak le hell kalnak kong ah an biaceihnak nawl kan ngei hna lo, a nih cu vanram a kai lai i khi pa cu hell ah a kal lai timi chim chung khawhnak kan ngei lo cucaah midang kha a duh na lo lo in mahbiaknak ah va luhter phung a si lo sihmanhsehlaw kan biakmi le kan biakning chimhnak nawl tu cu kan ngei dih, cucaah biaknak le biaknak karlak i remnak kan serkhawh ahcun rampi ah daihnak a leng lai.

Peace be unto you

Adonghnak

Daihnak kan timi cu pumpak cio cungah a um hmasa awk a si, pumpak cio nih vawleicung kan nun chungah daihnak hmuh timi hi a har ngaingai mi a si, kan rum zongah kan hna a ngam lo, kan sifah si le lungretheihnak in kan khat, ramdang kan phanh zongah kan hna a ngam hlei lo, lailei kan um ah le loh kan thlawh thing kan phorhnak ah kan keng a faak i zaan hmanh ah tthatthi in kan i hngilh kho lo, zingzan ei ding le fanheih hnipuan ah kan van a sang, lung hnangam deuh le dai deuh in khuasak nak caah rumnak tal kawl usih kan ti i rumnak kan kawlnak ah kan lungre a thei kan si a vang, cucaah daihnak kan timi hi a kawl len zongah hmuh khawh dawh in kan um ti lo zeicatiah daihnak a umnak ah kawl lo in a umlonak hmung ah kan i lawngvang cucaah a um lo nak hmun i thil kan kawl lengmang ahcun zeitik hmanhah kan hmuh kho lai lo, taksa, thinlung, thlaurau daihnak, rampi daihnak, khuatlang daihnak, mibu remdaihnak kan ti lengmang mi cu Zisuh sin lawnglawng ah a um cucaah daihnak kan kawl seh ti ahcun a umnak hmun ah kan kawl hmasa a hau i kan hmuh hnu ah a umlonak hmun zongah khan vazap chih a hau, cucaah zisuh sin ah daihnak cu va lak cio hna usih,zeicahtiah a mah cu Daihnak bawi a si, Daihnak ngeitu a si Isaiah 9:6..

SHALOM

Laimi le a Lamkip Tthancho

Laimi le a Lamkip Tthancho

Zabu 20 a hramlei hrawng i ca hmanh ttha tthi i a ngei rih lomi laimi cu, Pathian nih hoi theih thei ve hngal ve hnaseh, ramtang rumro i zeihngal lo i umpeng hna hi mifanau hna zaang tuk an si ve cang tiah American Baptist Missionaries hmangin a mah thawngttha bia a rak phuan, cu ti cun Missionaries pawl nih ca a kan serpiak, nun a kan chimh, fimnak, ngandamnak tipawl a kan cawnpiak i a rak kan zohkhanh, cu American Baptist Missionaries pawl thawng cun a tu ahcun laitlang ah zatuak 90 hrawng cu Khrihfa kan si cang, Christian state taktak ah a dirmi hi kawlram chungah laitlang lawnglawng hi kan si ko cang, Kachin, Kayin pawl zong an si ve nain laitlang tluk in zatuak a tam ti lo. Matluk i laimi ramtang rumro khua a rak sa mi hawidang ram he tahchun ngam hmanh a si lo mi cu, zisuh khrih kan i tleihnak le kan zumhnak thawng in nihin ni ahcun, van hramdeng le vawlei toi ahhin Laimi umlo nak a um tilo, Pathian thawngin kan duhnak rampoah kan phan kho cang, hawitheih kan thei ve cang i hawitheih rih lo mi hmanh kan theih mi um len sehlaw hngalh lo si hnga, Pathian nih a kan cawisan lio te a si, laimi chung in miramdang sinah hmaihngal pi awk minung tampi kan chuak, fimthiamnak lei siseh, mui le sam lei zongah kan langh pah thluahmah lio a si, cucaah a tulio hrawng hi laimi a lamkip in kan thancho lio a si, kan i thlen cuahmah lio a si, cun a lamkip in kan tlau hram kan i thok cuahmah lio zong a si, a lamkip in sual hram le kan Pathian hnu lei ah chiah riangmang in pumsa duhnak le tangka, vawlei chawva suingun lungvar lei tu kan hmai ah kan i chiah lio a si, cucaah a lamkip in kan thlen cuahmah lio a si i, kan chan hi ruah lengmang tik ah milung a la ngai hmailei ah laimi hi tthancho ttha in ma kan tthan lai tthancho chiat in dah ti hi ruah lo awk ttha lo a si,