India PM Narenda Modi Biachim Uar Um Ko!!

India PM Narenda Modi Biachim Uar Um Ko!!

Ka hnu zarh ah India ram Gujarat state ah Cawcong pawl nih Sifak, Dalit, India ram i mi nauta bik ah ruahmi pawl an vuak mi hna cungah siseh ,state kip i cawcong pawl nih Muslim le Dalits pawl an tuah to hna ning  kongah PM Narenda Modi nih Hindu cawcong pawl sin i a chimmi bia nih mi hnarno ruh tiang a ttam.. Naiten zarhpi ni ah Hyderabad ah a chimmi bia chung in ka lung a ka sumi biafang pawl tlawmpal ka vun lak lai.

"Attack me but not Dalits, Shoot me But Not Dalits"

Dalits pawl nan tuk le nan thah hna nakcun keimah hi ka tu uh law, ka kap uh, Dalit cu ti hna hlah uh, Dalit ai ah keimah hi thi ning. 

1. Hi Kongah biatak tein cawngcangh hram kan thok lai Dalit kan huhphenh hna lai. Ram pakhat nih kan doh ding kan riancu anti-social elements hi a si. India ahhin Ningzak a simi sifak neknak le thledan nak hi a um rih. Cu thleidannak hloh cu rampum pi kan rian a si.

2. Rampi kan rian cu Sifak le Dalit huhphenh le upat hi a si. Zeibantuk right dah Dalit ka u nau pawl huatnak ahhin kan ngeih mi a si, tiah biahal kan duh hna?

3. India minung lawng si lo, vawlei cung minung vialte sin ah minung le minung karlak i thleidannak a um mi hi cu ka cohlang kho hrimhrim lo. Cucaah hi thledannak hi kan kham hrimhrim lai.

4. Kan society hrimhrim ah Miphun, biaknak le nunphung kongah thleidannak hi um hrimhrim hlahseh. hi bantuk social problem kan hrial khawhnak ding ahcun a tubantuk in Dalit cungah fahnak a pe tu hna sin ah nawl kan duh mi hna a um cucu , miphun tthencheunak politics tuah hi ngawl hrimhrim uh. Thencheunak a chuahpi tu nanngainzi nih kan ram ah zei tthatnak hmanh a chuah pi lai lo.

5. Sifak le Dalit pawl khamh, zawnruah le upat hi mipi kan rian a si awk a si.

"Attack me if want but not Dalit, Shoot me but not Dalit" by Narenda Modi, India PM. 

Ref. the Indian Press

Personal Evaluation

A tu hi Narenda nih a chimmi bia pawl hi  i nunpi awk a tlakmi lawngte an si. Vawlei cungmi phun vialte nih social justice hi kan herh bikmi a si. Racial and Gender Descrimination nih Sifahtuknak/Poverty tiang a chuahpi, Pastor le Evangelist zong nih social justice thawngttha aupi a herh hringhran i miphun thleidannak a ummi kha hrawh cikcek i zuam a herh cucu Zisuh nih Paul hmang in Galati 3 ah a kan cawnpiak. Prophetic literature si seh ancient near eastern biaknak text pawl kan zoh tik ah a biapi bik in an chimmi cu social justice hi a si, Prophet Micah, Amos, Isaiah, Jeremiah te hna zong Social justice  kong a au pimi an si, cucaah miphun chungah thleidannak a um ahcun kan doh hrimhrim a herh. Sifak a nektu si lo in a bawmtu le a dirkamh tu siding kha kan bible nih a kan cawnpiak.  

Ref. Social Justice in the hebrew Bible by Bruce V. Malchow

Narenda Modi hi Topten 20 Ramhruaitu a fimbik tiah an thimmi hna chung zongah atel, 2014 ah Time nih Person of the year zong an rak pek, Communication thiam lengah foreign policy an uar bak mi pa a si.

"Thangtthat Nun"

"Thangtthat Nun"

 Salm 103

1 Maw Ka nunnak, BAWIPA cu thangthat tuah! Ka Sining vialte, a min thiang cu thangthat tuah u!

Thangthat nun ngeih hi David nih a duh tuk hringhran tinak a si, Maw mi vialte hna/ midang bawipa cu thangthat tuah uh a ti bak lo amah nunnak lila kha bawipa thangthat a fial, zeiruangah?? David nih PATHIAN thangthat a tthatnak kha ai fian tuk caah a si.

Nihin Laimi kan dir hmun ah micheu cu Biakinn kan panh i Pathian thangthat nun ngeih duhnak lungthin ngeih lo in Pathian thangthat nun a ngei i a lammi hna kan nihsawh tawn hna, ttih a nung tuk, Pathian thangtthat a duh ko nain mi hmai khah lo ruangah a thangthat ngamlo mi kan um hoi, Khabantuk kha Pathian zahpi bantuk a si caah ttih a nung nan nun ah luatnak taktak um kho lai lo, 

Pathian thangthatnak ahcun a ho hmanh zah an hau lo, na lungchung ah dir timi a rat ahcun dir bak, na thinlung ah na kut thlir ti a rat ahcun thlir bak, na pei bengh ti a rat ahcun beng bak hmanh, na pawngkam zoh hrimhrim lo in Pathian bak kha zoh hmanh, na thinlung sifah retheihnak a tlau hrimhrim lai. Pathian nih minung a kan ser hnawhchan hi na tuak ahcun amah sunparnak petu ding hrimhrim kan si timi nai fiang chin lengmang lai.

Pathian thangthat ruangah a lammi soi len hna hlah, Na lam ve khawhnak hnga tu thlacam, Pathian nih na kut na ke, ka hmur na ka an sermi kha tuak, zeiruang ahdah mizeng mi hna lak ah kei ka kal khawh, mitcaw mi hna lak ah kei ka hmuh khawh timi i tuak a dawtnak na thinlung ah phan hrimhrim lai, Pathian ni cu pumhni a si lo Pathian thangthat ni, sunparnak pek ni a si ti khi i fiang hmanh na thangthat khawh hrimhrim lai. Na thangthat khawh ahcun Pathian ai lawm lai, thinlung taksa, thlarau damnak an pek hrimhrim lai, nai lawmlai na zaang dam lai, na thinlung dam hrimhrim lai.

Pathian thangthatnak hmun ah Biatak nun ngei, nai biatak lo ahcun thlarau riantuannak na chungah um kho lai lo, capo aw soi in Pathian na thangthat ahcun na caah ttihnung a si lai, Zei ca tiah, John 4:24, "Pathian cu thlarau a si i a biatu hna nih cun thlarau le biatak in an biak awk a si" tiah ati cucaah biatak thlarau, thlarau biatak, in kan biak awk hrimhrim a si, biasawh le capo thlarau in si lo Biatak thlarau in a ti caah Biatak le thlarau, lungthin tak in bia hna usih, nai biatak ahcun Pathian lawng na hmuh lai i thangthat sunparnak pek lo in na um kho lai lo, Biatak in Pathian a bia mi na si ahcun na pawngkam zohnak mit le ruahnak a tlau hrimhrim ko lai,

Careltu vialte thangthat nun kan ngeih khawhnak hnga Pathian nih kan bawmcio hram seh. Biaktlak Pathian, Thangthat tlak Pathian, Zumhawktlak Pathian cu Amin thangtthat in um chin lengmang ko seh,, HALELUIJAH,, Bawipa nih thluachuah in pe hnaseh..

Na Dirhmun Fek

Na Dirhmun Fek

Unau ngai hmanh, kan chim hmanh lai
Na dirhmun fek, na bia leet hlah
na chimmi tuah, na tuahmi ruat
thangchiat ttih hlah, sual tuah tu ttih
thildik ttanh law, bia dik chim zuam
a hman mi ah, mi ttih hna hlah
tampi hngalh zuam, tlawmte lawng chim
nai tinh mi ah, lunghmunh i zuam
na tuah lai ding, chimchung tuk hlah
chim chung lo in, tuah khawh i zuam
dinnak ttanh law, sualnak cu hrial
dinnak nihchun, an luatter lai
harnak caan ah, na lungdong hlah
harnak thawngin, fawinak a um
timi philh hlah,Na dirhmun fek.

Ka Reng Chin Lai ka phang

Ka Reng Chin Lai ka phang

Zanriah ei lai, ngaihlah a hruai

ei lo ah le, mi paw a ttam

meh zoh ahhin, milung a dong

Dal hraikhat ah, a fe keukhat

Ei lai poah ah, ban i hlim in 

minchalh ta hau, pasal lai pa

maw ka si lo, ti'n dak dak 

hmasa a hau, mah cu hnu ah

exercise hna, tuah vun tuah ta in

cu hnu lawngah, ei khawh a si.

Keimah chinchap, ei chiat chinchap

der ngai chinchap, aa tlak hrim lo

ka reng chin lai, a hnu ahcun

vam awng hmanh ah, kai tenh te lai

ka reng chin lai i, ka hawi le nih

an ka hmu kho lai, lo ti ka phang

Masala khi, meh peih hlah maw

a si ka ti, India ahcun

an kio meh ah, masala peih

hin te lo in, masala tu ah 

meh an peih ai. ka bia meilah

lotlau he cun, tthen awk kan ttha 

hrimhrim rua lo!!!

Thapeknak

Hawi le hna

Mathai nih a ttialmi Zisuh kong thawngtha 26:41 hmang in thazaang pek kan duh hna

(Tukforhnak chungah nan luh nakhnga lo hngilh lo tein um ulaw thlacam tuah uh)..

Zumtu hna nun ah thla kan cam lo ahcun tukforhnak chungah kan um tinak a si, cucaah thlacam a herh hringhran.

Zumtu nun hi Battery siseh law, thlacam hi solar bantuk a si. Thlarau thazaang der caan ah thla na cam lo ahcun na tlu thai peng lai, na thlarau thazaang a dawng mi pih tein tun tthannak cu thlarau solar thlacam le bible rel hi a si.

Caan khat lio ah Pathian bia in cawm cangmi na si kolai sihmanh sehlaw cawmtu/cawnpiak tu an kal hnu ah na dawng i na tlu tthan tawn, cucu zeiruang dah a si? crusade le camping ah cawnpiak tu hna nih khim tein an i cawm, a si nain an i kaltak tik ah nangmah tein cawm nai tim tawn lo, na thlarau paw a ttam mi kha thlarau tirawl pek na theih ti lo caah na tluk tthan lengmang nak a si.

Cucaah na thlarau thazaang a der ko lai a si nain phungchimtu le cawnpiak tu hngak ti hna hlah, nangmah te in na thlarau pawkhim nak caah nai cawm kho ko, cucu thlarau rawl cu Pathian biathiang rel le thlacam hi a si. Thlacam nun le thangtthat nun ngeih nih mi hna a ngamter i lung a daihter, lam a tluanter, nun a damter.

Mark 11:24 ah"thlacam in nan halmi thil poah kha kan hmuh cang tiah zum u law, nan halmi poah cun nan hmuh kolai a ti" zumhnak in thlacam a herh zia kha a kan cawnpiak.

Reltu vialte kan biak Pathian nih thlacam nun thluachuah in pe hnaseh.........

Khua Ka Ruat!!!

Khua Ka Ruat!!!

Lailei kong cu ka hei ruat, kan nu le kan pa fur tthal hlen bak in rian an ttuan mi hna ka hei tuak, an nih, nih thideng in pawcawmnak caah chun zan hlan in rian an ttuan, lo an thlo thing an phor, an fa le hawi lo ve hnaseh tiah a kenkip lo ah sianginn a kan kaiter cio mi te hna ka hei tuak, sianginn a kaimi nih le lailei rian a tam saling ah kan um hna lo i sianginn kaipah in nu le pa rian hmanh kan bawm kho hna lo, kan nu le kan pa an retheih an thabat he lo lam an tlun pah ah na fapa/fanu nih phaisa 200000 in ka kua hnaseh an ti hna tiah fa le phaisa cah hna an vun chimh hna, aw si maw ka fa a hal tuk cang lai cu ta tiah an ngeih lo hmanh ah lo kalnak kutke hmanh ttawl ta lo in do cawipiak ah an vak i mitchimh kamhseh in mi kam an keu, mi inntung an rel, athai zingah fanu fapa phaisa kuatnak ding ah a hodah Hakha, Thantlang ah kal hnga ka fa phaisa kuat hau tiah mitlung kal an hlat, fa le tangka har lai le mizoh hawi hal in um lai an ruat kho hrimhrim lo. Aw nu le pa nih fa le a kan dawtning ngai hi ka ti. 

Cu tluk i nu le pa nih fa le a kan dawt i, ka fa hawi lo veseh tiah sianginn a kan kaiter lioah micheu khat cu nu le pa dawtnak le temh innak tuak bak loin a ummi kan tampi rih, nu le pa le u le nau nih thideng in hlawhmi le hmuh mi phaisa a luhnak tuaklem lo in duh poh in kan suaksam ttheu tawn, zuu hna kan dinnak hawi le he nuamhsaihnak menmen ah nu le pa le u le nau tha le zaang pi kan rak hman lengmang ko mi hi cu tuak setmat ahcun tuk a rak sum ko.

Sianginn kan kai cio hna ruangah nu le pa rian bawmh caan kan ngei lo, lailei rian a dih i khua a pau lei ahkhin kharpi cu si kaw kan tlung cio hna, cheukhat cu rian a tlawmlio i rian ummi hnihkhat tete zong nu le pa bawm tuah hna usih ti ruahnak kan ngei bak lo, kan nu le kan pa nih sianginn kan kai kar i thideng in rian an ttuan mi zong tuak bak lo in kan um lio i rian an ttuan zongah kan zoh sawh ko hna, micheu cu nu le pa nih rianttuan sianh lo mi zong an um ve ko lai nain a tamdeuh cu lailei ahcun nu le pa rian bawmh a herhmi lawng te kan si. Cheukhat le bang cu tlun caan ah innchung khar ah bawi phun in umter kan hmang, nu le pa tu upat lo in rian hna fial salam a hmang mi zong kan um, kan duh lo mi meh an chuan hmanh ah nu le pa a that deng mi kan um, innchungkhar nawl ngeibik phun in kan um tawn hna i ruah satmet ahcun tuk a summi a si i mah le mah rak i hngalh lo pakhat zong a si. 

Cucaah sianginn a kai cuahmah mi ka hawi le vialte hna, Nu le Pa le u le nau hna nih thideng in sianginn a kan kaiter mi hi ruat cikcek hna usih. Na kaimi ah luhlinh bak in i zuam law na caan hman zia thiam cang, nu le pa u le nau nih thideng le thlenti put in hmuhmi phaisa in sianginn a kai mi ka si ti philh hlah. Nu le pa u le nau nih thiding in hlawhmi phaisa in sianginn a kaimi ka si caah phaisa hmanzia ka thiam a herh i kai zuam zong a hau timi ruahnak ngei hna usih. Ca zuam hi nu le pa rian bawmh pakhat a si ve timi ruahnak ngei hna usih. NU LE PA DAWTNAK le temh inn nak U LE NAU retheihnak le hartuarnak ruat satmet tein sianginn kai hna usih. Nu le pa dawtnak fiang bu tein le ruat bu tein sianginn kai hna usih. Ka cawn mi le ka kaimi hi ka thiam hrimhrim a herh i mi tiang ka chimh khawh ve hna a a hau timi ruat bu tein sianginn kai i zuam. Sianginn kai ttung i thiammi le theih hngalhmi zeihmanh a um ttung lo ahcun nu le pa caah sifahtertu rungrul men kan si ko lai. Cun sianginn kai chung hi lai lei rian a tam saling a si kan ti cang bang khan kan cawmmi ah thiamnak le theihhngalh nak chapmi ngei lo in sianginn kan kai cun, cubantuk cu lai phungthluk i EI LAWNG CHUAK TUAN ZAM men kan si ko lai. Cucaah sifahtertu rungrul le ei lawng a chuak i ttuan ah a zam mi kan sinak hnga lo ca i zuam hna usih law sianginn kan kai nak ah lungfim tein le fimkhor, khuasum khuahna tuak bu tein Phaisa hmang hna usih.  Ei lawng a chuak i ttuan ah a zam mi kan si loding le sifatertu rungrul kan si loding a biapi tuk.