Khuasik Caan le Xmas Thlaurau

Khuasik Caan le Xmas Thlaurau

Minung nih a tlaih zong kan tlaih khawh lomi, liam rih hlah tiah thlauh len zongah thlauh khawh a si lo mi ni le caan cu amah liam in a hung liam ziahmah bantuk in Laimi Khrihfa vialte nih vawleicung puai vialte lak ah kan sunhsak bikmi le hngahhlang ngaimi a kan khamhtu chuahni tiah ruahmi mifim mi rum sifaak, mihrut santlai lo tiangin thirthar he kum tin te kan lawmh tawn mi Xmas cu kan naih ziahmah cang, a rimrua cu hnar vun fik ah theih pah khawh a si cang, Khamhtu taktak chuah thla a va si caah cun teh a si hnga thladang he cun a rak i bang lo hrimhrim ko rua.

India ram nilin le khuasa henghung pi hmanh November thla vun luhcun a hung dai ziahmah, cu lawng hlah zing ni ceu hrimhrim a rak i dang tuk teh, thla dang ni he an ceudan a dang deuh vingmang, minung lungthin zong a vun i thleng ziahmah ve, umtu hoihar aa dang, mi lung a hlau, harha a zaang, lung a hrephrioter zingthawh kaa aw dawh phunkip he a zai tawn mi vate te zong awidang tawnnak in an aw a khing deuh.

Cherry pangpar le tlangsangpar zong November thla cun khamhtu chuahthla chuah langhnak ah tiin timhtuahnak an ngei cuahmah i an i mom lio te a si, Zing niceu dawh tlaan in tapchak i a ngor ko mi tar nu tar pa hmanh chumtual ah biaphawn an deng i nikhuaceu dawh an lawm, khuasik dapti lak ah lailei semmawng, tleirawl hna zong lei facang var lak ah zanleisang cun phaikalh hmanh hram an vun thok cuahmah, lailei nu le pa cheukhat hna zong Xmas lai fa le thilduh zalhpiaknak ah tiin an phaisa hmuhchun tete an i khon cuahmah lio a si, a khuakip le ramkip i sianginn kaimi hna zong Xmas i lai lei an khua tlun timhlamhnak kong lawng an ceihcuah mah lio a si, Khua thlanglei kuli a lek mi laikhal valttha rual zong an phaisa hmuh chun mi hmang in Mizoram Khuapi deuh ah duhhalh le sahlawh rualchan chungkhar caah tiin thilduh tampi le India chuak mutthai an cawk hnu ah, an phaisa taangmi lai lei an vun hluai i an khua phanh lai ngaih lawng si loin Hakha i phaisa an an kuatmi fa hlam hrimhrim ngaihtuk buin lairam an panh cuahmah lio a si, vawlei misual kan caah Zisuh cu kan laksawng a si ve ti a theimi laimi cheukhat cu an pi le an pu nu le pa a tar deuh cang mi kha laksawng pek awk in timhlamhnak an ngeih lio pi zong a si, cu lawnghlah ramthumnak ummi laimi cheukhat zong lai lei khua i an chungkhar le u le nau nu le pa Xmas thilduh cawknak ah kuatding phaisa tiah har le fe in phaisa an hmuhmi an i khon cuahmah lio zong a si chih teh, maw a va nuam i a vaa idawh hringhran dah khuasik caan le Xmas thlarau.