Sifahtertu Rungrul Siloding a Biapituk

Sifahtertu Rungrul Siloding a Biapituk

Lailei kong cu ka hei ruat, kan nu le kan pa fur tthal hlen bak in rian an ttuan mi hna ka hei tuak, an nih, nih thideng in pawcawmnak caah chun zan hlan in rian an ttuan, lo an thlo thing an phor, an fa le hawi lo ve hnaseh tiah a kenkip lo ah sianginn a kan kaiter cio mi te hna ka hei tuak, sianginn a kaimi nih le lailei rian a tam saling ah kan um hna lo i sianginn kaipah in nu le pa rian hmanh kan bawm kho hna lo, kan nu le kan pa an retheih an thabat he lo lam an tlun pah ah na fapa/fanu nih phaisa 200000 in ka kua hnaseh an ti hna tiah fa le phaisa cah hna an vun chimh hna, aw si maw ka fa a hal tuk cang lai cu ta tiah an ngeih lo hmanh ah lo kalnak kutke hmanh ttawl ta lo in do cawipiak ah an vak i mitchimh kamhseh in mi kam an keu, mi inntung an rel, athai zingah fanu fapa phaisa kuatnak ding ah a hodah Hakha, Thantlang ah kal hnga ka fa phaisa kuat hau tiah mitlung kal an hlat, fa le tangka har lai le mizoh hawi hal in um lai an ruat kho hrimhrim lo. Aw nu le pa nih fa le a kan dawtning ngai hi ka ti. 

Cu tluk i nu le pa nih fa le a kan dawt i, ka fa hawi lo veseh tiah sianginn a kan kaiter lioah micheu khat cu nu le pa dawtnak le temh innak tuak bak loin a ummi kan tampi rih, nu le pa le u le nau nih thideng in hlawhmi le hmuh mi phaisa a luhnak tuaklem lo in duh poh in kan suaksam ttheu tawn, zuu hna kan dinnak hawi le he nuamhsaihnak menmen ah nu le pa le u le nau tha le zaang pi kan rak hman lengmang ko mi hi cu tuak setmat ahcun tuk a rak sum ko.

Sianginn kan kai cio hna ruangah nu le pa rian bawmh caan kan ngei lo, lailei rian a dih i khua a pau lei ahkhin kharpi cu si kaw kan tlung cio hna, cheukhat cu rian a tlawmlio i rian ummi hnihkhat tete zong nu le pa bawm tuah hna usih ti ruahnak kan ngei bak lo, kan nu le kan pa nih sianginn kan kai kar i thideng in rian an ttuan mi zong tuak bak lo in kan um lio i rian an ttuan zongah kan zoh sawh ko hna, micheu cu nu le pa nih rianttuan sianh lo mi zong an um ve ko lai nain a tamdeuh cu lailei ahcun nu le pa rian bawmh a herhmi lawng te kan si. Cheukhat le bang cu tlun caan ah innchung khar ah bawi phun in umter kan hmang, nu le pa tu upat lo in rian hna fial salam a hmang mi zong kan um, kan duh lo mi meh an chuan hmanh ah nu le pa a that deng mi kan um, innchungkhar nawl ngeibik phun in kan um tawn hna i ruah satmet ahcun tuk a summi a si i mah le mah rak i hngalh lo pakhat zong a si. 

Cucaah

Sianginn a kai cuahmah mi ka hawi le vialte hna, Nu le Pa le u le nau hna nih thideng in sianginn a kan kaiter mi hi ruat cikcek hna usih. Na kaimi ah luhlinh bak in i zuam law na caan hman zia thiam cang, nu le pa u le nau nih thideng le thlenti put in hmuhmi phaisa in sianginn a kai mi ka si ti philh hlah. Nu le pa u le nau nih thiding in hlawhmi phaisa in sianginn a kaimi ka si caah phaisa hmanzia ka thiam a herh i kai zuam zong a hau timi ruahnak ngei hna usih. Ca zuam hi nu le pa rian bawmh pakhat a si ve timi ruahnak ngei hna usih. NU LE PA DAWTNAK le temh inn nak U LE NAU retheihnak le hartuarnak ruat satmet tein sianginn kai hna usih. Nu le pa dawtnak fiang bu tein le ruat bu tein sianginn kai hna usih. Ka cawn mi le ka kaimi hi ka thiam hrimhrim a herh i mi tiang ka chimh khawh ve hna a a hau timi ruat bu tein sianginn kai i zuam. Sianginn kai ttung i thiammi le theih hngalhmi zeihmanh a um ttung lo ahcun nu le pa caah sifahtertu rungrul men kan si ko lai. Cun sianginn kai chung hi lai lei rian a tam saling a si kan ti cang bang khan kan cawmmi ah thiamnak le theihhngalh nak chapmi ngei lo in sianginn kan kai cun, cubantuk cu lai phungthluk i EI LAWNG CHUAK TUAN ZAM men kan si ko lai. Cucaah sifahtertu rungrul le ei lawng a chuak i ttuan ah a zam mi kan sinak hnga lo ca i zuam hna usih law sianginn kan kai nak ah lungfim tein le fimkhor, khuasum khuahna tuak bu tein Phaisa hmang hna usih.  Ei lawng a chuak i ttuan ah a zam mi kan si loding le sifatertu rungrul kan si loding a biapi tuk.