2020 Electoral Fraud le 2021 Feb 1 Ralkap Uknak Lak

 2020 Electoral Fraud le 2021 Feb 1 Ralkap Uknak Lak

Hawi le hna tutan ralkap nih uknak an lak hi anmah ralkap nih an laknak a ruang fiang tein an chim, voi tampi an chim hnu ah an lakmi a si, cucu electoral fraud/ voter lists allegation/thimnak ah ningcang lo mee a tam ruangah a si ti kha a si. Cucaah 2020 Nov 8 Election hi chim lo awk ttha lo a si. 2020 Nov thimnak hi election monitoring teams/groups timi thimnak a dik fel le fel lo ngiathlai tu nih ttha tein an zoh i thimnak cuantu bu tampi lakah ramleng in Carter Center, Asian Network for Free and Fair Election le Euroupian Union nih 2020 kawlram thimnak hi a dikmi thimnak, thlamlang thimnak a si ko tiah official in thanhnak a tuah. Kawlram thimnak an lawmhpinak zong kha an rak ttial. U Hla Thein hruaimi UEC hi zeitluk in dah an i ralrin ve ti ahcun thimnak timhtuahnak an tuahmi ah hmuh khawh a si, State kip ah voters list/ me sazin/ thimfung thlatu min kha voi thum voili tiang check tthannak an tuah, cu hnu ah vote counting ah media an auh hna i media live hmai ah thlam lang taktak in vote/ thimfung kha an rel dih cikcek, khuate lei chim loin, a si nain ramchung ral le humhimnak chambau ruangah mesandah nemae/ constituencies zei mawzat ah thimnak an tuah kho lo, a si nain thimnak an tuah lonak hmun mipi sin in zeibantuk complaints faak tal a kai maw ti kha kan theihdihmi a si. 

Cucaah 2020 thimnak hi 2015 le 2010 nakin a free i a fair deuh timi an tam ngaingai. A sinain mipi nih kan i fian ding cu thimnak timi hi fully/a diklak in a dikthlir tein a kal dih ko timi Election monitoring mechinism ah IT le digital a hmangmi ram hmanh a um kho lo tihi cu kan i fian a hau. US pi hmanh a buai ko khah cucaah hihi cu common sense/mizapi nih ruah khawhmi a si. Thil pakhat a ummi belte 2020 kawlram thimnak ah election monitoring team a simi People Alliance for Credible Election timi group kha hnon an tong, a ruang ka thei huaha lo. Cucaah ralkap lei chimphuannak ttuanvo ngei Zaw Min Htun nih press conference a tuah lio i vote fraud kan khawmh an timi cauk lengluang kha le 8-10 millions leng vote fraud a um an timi hi zeiti hmanh i a dikmi thil a si thiam lo, uknak lak duh ah an serchommi a si ti hi a lang ngaingai. A si nain NLD nih electoral fraud kongah ralkap challenge mi zohfelnak le fianter a tuah duh huaha lomi tu cu NLD mawh a si ve hnga, khat lei in a um rihmi cu thimnak zong a lut lomi ralkap nih election kong i thlak hi sullam ngei lo khan a si hoi.

Khuaruahhar a simi cu political parties 87 aa zuammi chungah political party pical deuh timi tlangcung party pawl sin in UEC sin ah complaint a um lo ti khawh a si, election tampi cu aa lung si lomi an um ko nain kan sung bak ko timi an cohlan i a tamdeuh cu an dai bak, a si nain thil khuaruahhar a simi cu USDP le parties dang pa hnih thum nih election result challenges an tuahmi kha a si. Kawlram phunghram kilvengtu, kawlram kuai a khamhtu tiah aa ruatmi ralkap MAL hruaimi an i roih tik hna ah a tubantuk in anmah ralkap nih khua an rak khanmi hnarcheu democracy, le cheuchin federal in 2011 in kawlram 2020 tiang a kal cangmi, pumtlamtling lo democracy, a zengmi democracy cu an thihter lawlaw tthannak a si.  

#comments 2021 June 11#

2020 Union of Myanmar General Election Result

 Union of Myanmar Election Result Tawifiang

Nizan 15 November 2020 ah UEC nih kawlram thimnak phichuak cu official in a vun thanh.

2008 phunghram tangin tuahmi a voithumnak, 2020 November 8 Sunday i tuahmi Myanmar General Election ah Union Election Commission nih political parties le number of seat, candidate and hluttaw statistics a langhter ningah, Political party 87 nih thimnak ah an i zuam i a minung in Hluttaw Palai seat aa cuhmi hi 5639 an si. Tutan thimnak ah rampumpi Pyithu Hluttaw Constituency 315 ah an tuah i Amyothar Hluttaw Constituency 161 an tuah, Ethnics Affair Ministry caah Constituency 29 an tuah, State and Region Hluttaw Constituency 612 ah an tuah, State & Region, Amyothar & Pyithu le Ethnics Affair an dihlak fonh in tukum ah tthutnak a dihlak hi kawlram pumpi huap Union + State and Region 1117 a si. Union of Myanmar milu rel 53.71 Millions lak ah vote thla kho dirhmun a simi 37 Millions nih vote or thimfung an thlak. Hi thimnak ah aa zuammi Parties 87 lakah Parties 19 nih teinak an hmuh i Independence in minung 4 nih teinak a hmuh.

1. NLD nih Pyithu Hluttaw seat 315 ah seats 258 a lak. Amyothar Hluttaw Seats 161 ah 138 seat a lak, cucaah Union Hluttaw ah NLD nih seats 396, a tei i state le region hluttaw seats 612 ah seat 501 a lak, Ethnics affair hmun seats 29 ah 23 a lak. Cucaah rampumpi huap in seats 1117 ah NLD nih 920 a lak.

2. USDP nih P-H ah 26 seats a lak i Amyothar ah 7 a lak, State and Region ah 38 a lak i rampumpi level in Seats 71 an lak.

3. Shan Nationalities League for Democracy nih Pithu ah 13 an lak, Amyothar ah 2 a lak, State ah 27, rampumpi level in 42 an lak ve.

4. Arakan National Party nih Pithu ah seats 4 an lak, Amyothar ah 4 an lak, State ah 7 and a lak i a dihlak in 15 an lak.

5. Mon Unity Party nih Pithu ah Seats Pithu ah 2, Amyothar ah 3, State ah 6, Ethnics ah 1 zapi 12

6. Ta'ang National Party nih Pithu ah 3, Amyothar ah 2 , State ah 7 zapi 12

7. CNLD State seat 1

8. ZCD Pithu 1 and State 1, Zapi 1

9. Kachin Democratic Party, State 1

10. Kayin People Party State 1

11. Wa National Party. Pithu 1 and State 2, zapi 3

12. Arakan Forward Party, Pithu 1 and State 2, zapi 3

13. Kayah SDP Pithu 2, Amyothar 3 and State 3, zapi 8

14. Lahu National Development Party, State 1, Ethnic 1, zapi 2

15. Kachin State DP (Kachin) Pithu 1, State 3, api 4

16. Lisu National Development Party, State 1, Ethnic 1, zapi 2

17. Pa O National Organazation, Pithy 3, Amyothar 1, State 7, zapi 11

18. Shan Nationalities Democratic Party, State 1

19 Kayang National Party, ethnic 1

20. Independence,  State ah 2 seats an lak ve.

A cung ka langhter bang in teinak a hmumi party nih 2020 Union of Myanmar General Election ah votes an hmuh cio ning a si. Kan hmuh bantuk in tukum thimnak ah NLD nih Union Hluttaw ah  83% in teinak a hmuh i, State and region hluttaw ah 81% in tei. Ethnic Affair ah 79 % in tei i Rampumpi level in 82% in teinak a hmuh. Cucaah tukum Union of Myanmar thimnak cu NLD nih vawlei cim bantuk a tei i a khuh dih. Tukum thimnak ah constituency 22 ah thimnak tuah khawh a si lo, tling tein thim sisehlaw Pyithu Hluttaw ah Elected Palai 330 an um awk a si i Amyothar Hluttaw in Elected Palai 168 an um awk a si, cucaah a tuning khin cu Pyithu ah hmun 15 a bau i Amyothar ah hmun 7 a bau tinak a si.

Tukum ah Pyithu Hluttaw in mipi thimmi 315 sin ahkhin ralkap lei thlahmi palai 110 an i chap lai i an dihlak 425 an si lai tinak a si. Amyothar hluttaw ah mipi thimmi 161 le Ralkap lei in a rami  56 an i chap lai i an dihlak in 217 an si lai. Amyothar Palai 217 le Pyithu paplai 425 kan fonh tik ah palai 642 nih Pyithaungsuh Hluttaw in President an thim te lai. Khah ka bia ka pial sual cang, theih duhmi nan um si le Hluttaw Brouchure ka rak in ttial piak te hna lai.

Hmailei ah zaapi nih kan zoh khawh dingah le mizaapi nih fianghlang tein 2020 Myanmar Election thimnak result theih cio usih ti saduthahnak he ka vun ttialmi si. 

#05june2021#

x

2021 February 1

 2021 February 1, zinglei suimilam 4 AM in Union of Myanmar cu Ralkap nih uknak a lak. Ruling party a simi NLD hruaitu State Counselor, President U Win Myint telh in Chief Minister kip le Union Minister pawl cu a tlaih hna i a hren hna. Caan karlak president ah ah ralkap vice president thlahmi U Myint Shwe cu tuanvo an pek i, National Defense and Security Council Meeting a auh hnu ah, rampi nawlngeihnak tteng thum, excutive, legislative le judiciary cu ralbawizik Min Aung Hlain sin ah a pek!

Diary

2021 Feb 1 

9:00PM

Reading Note on The Hidden History of Burma, Race, Capitalism and the Crisis of Democracy

Colonial period chung vialte kawlram cu British India vialte lak ah a rum bik a si, Eidin lei siseh cathiam sang lei zongah kawlram cu a rak tthawngtthal bik kan si, 1920 ahcun Rangon le Newyork hi vawlei cung mipem tam ah aa zuammi an rak si, i India cattial thiam Mira Kamdar le bang nih cun "Our First America" a rak ti phah. 1931 ahhin 7 percent of myanmar population hi Indian an rak si i 14 million hrawng an rak si, Tinbaw deuh in an rak ra nain Arakan ram i a rak phanmi tu cu Overland in a rami an si. Indian pawl kawlram an rak luh hi 20 century i vawlei cung mipem chungah a tambik an rak si. Plural sociey timi zong hi J.S Furnivall nih kawlram Indian mipem, kawlram an luh hnu in kawlram ah a hman hmasa mi word a si. 

( P 18, Thant Myint U) 

British uknak tang ah kenkip loin chuah luh khawhnak a tuah tik ah, India, Chinese le European tamtuk an lut, Investor lawngte an si tik ah kawlmi phun cu a tangbik dirhmun ah rak chiah an si. 1920 lio i kawlram police a rak ttuanmi George Orwell nih ttialmi cu, " fiangte in kan chim ko ahcun Britist nihhin kawlram cu a hrawhhral dih i kawlram ngeihmi vialte cu mi ta ah a ser dih bak ko" ti tiang a rak ttial. Hi lio ahhin Britist cu Europe an si caah European pawl cu a sang bik ah an i chia i a chang tu ah India, Chinese le a donghnak ah Kawlmi business a tuahmi, ramngei le civil servant deuh kha an si. 

(P 20 Thant Myint U)

Mirang nih 1824 i Arakan a rak lak tik ah chaklei Rakhine ram cu mi an rak umtuk ti lo, cu tik ah Arakanese refugee kawl siangpahrang nih a rak tuk lio i Chittagong i a rak zammi kha an rak kir tthan. Zabu 19 donghlei le zabu 20 thok hrawngah hin Chittagong bangali holh ahmangmi muslim zong hi chaklei Arakan bordar hrawngah an rak phan ve. 1871 ahhin Arakan population ah Muslim hi 5 percent hrawng an si, Arrawaddy lei in a rami Buddhish pawl zong 1911 hrawngah thlanglei Rakhine an rak phan ve i, 15 percent hrawng an si ve. Cu tik ah Phun cawh le holh cawh le biaknak cawh in um nak a si.

Colonial periond chungah British nih zeitik hmanh ah Rohinya a ti bal hna lo, an mah chaklei Arakan muslim pawl nih an i auhnak a si. Rohang ti a si i, anmah nih Arakan an auhnak min kha a si, Arakan cu kan i semnak hmun a si ko an ti duhnak. Colonial pawl nih cun chittagonian timi le Arakan Muhomedan tiah an auh hna i, Aliens muslim le Arakan buddish neighbor muslim, siangpahrang uknak chan in a rak um cangmi tiah an tthen hna. (T-M-U-P 26-27)

World war I a rak chuah tik ah Gandhi le Indian National Congress nih an aupi mi home rule timi policy si cu British nih a dang Indian province bantuk in semi-elected parliment timi cu 1922 ah kawlram zong a vun pek ve, a si nain biachat tu tamdeuh cu hi nawl pek hnu zongah British tthiamtthiam an si ko. Cucu G Orwell nih "the mask of democracy" a rak ti phah.

British nih, kawl ram chung um natives miphun tthencheunak a tuah, martial race le non martial race in a tthen hna i kawlmi taktak cu non martial race a ti hna, kawl mino phun ttanh cheukhat nih kawl sunparnak laktthan ding le colonial uknak in luatnak kha ruah hram an thok i plural society timi khan chuahnak an ruat. Indian pawl cu kawlram chung a kenkip lo ah an um, burmese mino cheukhat caah Vawleithar tiah ruahmi Rangon kal cu ramdangmi vawlei i va kal bantuk khin an ruah, market place vialte cu Indian deuh nih rak uk a rak si. An ram cia ah ramdangmi an rak hluanh kha an celh lo. Indian mirum le chawletthal bankers pawl kha kawlte nih tax le loans an pek khawh ti hna lo tik ah kawl le Indian karlak ah buainak cu 1930 ah a chuak ciammam i minung 100 tiang an rak thi.

Cu ticun mino deuh Aung San te hna an vun chuak i Do Bama Asiayone timi bu an dirh, Parlimentary politics cu an rak hrial ngaingai i, communist party hi rak dirh hmasa mi a si, hlan lio i British ca i rak chiahmi min khan thakhin or master tiah an mah tein an i au cio i, nihin i national anthem, da do pye, dak do mye, doh paing kheh may, timi cu an rak sak i mirang doh hram cu an rak thok. Cu ticun kawlram nih India he tthen dingin an hal lengmang bantuk in 1937 ah India he tthen a si. British nih nawlngeihnak pipa taktak an ngeih dih ko bu ah semi-parliment in thimmi pawl kha nawlngeihnak cheukhat, a ttengnge deuh pek ve an si tik ah, miphun ttanhnak lungput cu a linsa chin thluahmah, a hlei in Islam biaknak Indian mipem 7 million nih an zulhmi cu Buddish biaknak caah ttihnung a si tiah pamphlet in ca an chuah, hi lio ah Rangon khuami hnarcheu cu Indian mipem an rak si. Cu tik ah 1938 ah India mipem chungin Muslim le kawlmi karlak ah buainak a chuak tthan. 1939 ah Parliment nih Budish women special marriage and succession act tiang an chuah. 

Cuti cun kawlram cu nichuah lei in Japan nih 1942 ah a rak lak i British pawl zong cu India ah a rak dawi hna, hi lio ah ke in a kalmi India phanh manh lo in a thimi hi 10000 hrawng an rak si. Japan nih Thakhin pawl hruaimi Burma National Army zong cu training an rak pek hna. 1945 ah mirang nih kawlram cu an lak than nain tlawmpal te lawng an um i January 4, 1948 ah Independence lak a si i cuticun commonwealth in kan rak chuak. Thla tlawmpal a rauh hnu ah, kawlram cu ramchung ral a tho i communist, Mujahid le KNU hna an si. A si nain democracy phunphai cu kum kua hra cu a kal ve ko, 1962 March 2 ah Ralkap nih uknak a lak Revolutionary Council a ser, Burma Way to Socialism policy a vun hman i, Indian mipem 400000 leng cu an rak ah a dawi tthan hna. (T-M-UPa 29-30)

Ruah a Hau

 A ngaingai ahcun Chin mipi nihhin zeidah federal cu a si, democracy cu teh zeidah a si, nuhrin covo le zalonnak taktak hi teh zeidah an si, 2008 phunghram cu zeidah remh hau, 2008 phunghram ahcun zeidah a um i, 2008 phunghram cauk hi a hring ma a nak, khua zeidah um ti hmanh a fiang lomi kan tamtuk, khuate lei lawng kan ti cun kan palh lai caah khuapi ummi cheukhat zong nih a ruah awk a thei lomi an tamtuk. Mah I election campaign ah candidate pawl nih federalism, seft-determination le democracy kongah party policy aupi chih khi vote thlatu mipi caah thlitu lak voihvoih bantuk a si rih.

Cucaah tthanchonak le fimthiamnak, thingram humhaknak le remdaihnak, mipi he rianttuantti ding in bia tampi chim kha a ttha deuh ding si. Mino nih party politics in nationalism aupi lennak in zeitindah think tank organization tampi kan dirh khawh lai i CSO, Media thazaang in mipi vialte civic education kan pek khawh hna lai, democracy le federalism kong hi kan aupi lai i zeibantuk ca dah kan rel lai ti hi kan ruah deuh awk a si i cucu miphun dawt a si deuh. Lam le sul tthat dih hlan, mei kan ngah dih hlan le electronic media and communication devices khuakip nih kan hman dih khawh hlan cu thiltampi kan fiang khawh rih lai lo.

Cucaah pu Sui Thio bia hlan cun, lam, hlei le myo, sizung, sianginn le hall sakpiak kho tu ding candidate kha thim si te kolai zoh hmanh uh hihi. Arsa tampi that i mipi a hleh kho tu kha arsa ei tti tampi an ngei rih kolai. Direct in development policy aupi thiammi nih an hmuh te kolai. Miphun min aa hlanmi zong zeipi pa an si lai lo. 

Pu Tial Ling Konglam

 Chuahkehnak

2020 November 8  Myanmar ram pumpi thimnak ah NLD party in Chin State Hakha Peng ah Pyithu Hluttaw Representative (Pyithu Hluttaw Palai) in aa zuam dingmi Pu Tial Ling cu Thantlang peng Congthia khua ah a 1955 May 25 ni ah a chuak. Pu Pa Raang le Pi Dar He hna i an fa le 7 lak ah a hniangbik a si. 1984 kum ah Pu Zam Lian (Sur Khua) le Pi Zing Iang hna i an fanu Pi Biak Hnem he thitumnak an tuah i Pathian nih Fanu pathum le fapa pakhat thlua a chuah hna.

Sianginn Kainak Kong                                                                                                                       

Congthia, State Primary School in Tangli a awng, Hmawngtlang Middle school in Tangriat a awng. Cu lio tangsarih cu District in camipuai tuah arak si i Thantlang peng ah first division in a mah lawng a rak awng mi a si. Hakha State High School in 1973 ah tanghra Distinction 2 (Physics le Maths) in a awng. Mandalay Arts and Science University in 1977 ah Bachelor of Science in Physics (B.Sc) degree a lak i 1982 ah Master of Science in Physics (M.Sc) degree zong a hmuh. Cozah rian a tuan pah in Yangon University, Human Resource Department in  2010 ah Diploma in Global English a awng. 

Kawlram Chung a Riantuannak Kong

1. 1980 in 1984 tiang Monywa College ah Department of Physics in Demonstrator/Tutor rian a ttuan i Public Service Selection and Training Board (PSSTB) ah rian a phit hnu in 1985 ah Research Officer, Medical Research Department (Yangon) ah vuanthok rian in aa thial. 

2. 1992 kum in a rian a kai i Head of Engineering Department ah Assistant Director Rank in 2004 tiang rian a ttuan. 

3. 2004 in 2006 tiang Korea and Myanmar Medical Research Joint Project in dirhmi Hepatitis B Vaccine factory ah Deputy Director (Chief Engineer) rian a tuan i an factory cu 2006 in a Cozah nih Ministry of Industry ah a thlen, Deputy Director in 2006 Ministry of Industry ah kum 7 a ttuan hnu ah 2013 December ah cozah rian in pension a la.

4. Cozah rian in pension a lak hnu 2014 in 2020 March thla tiang, Silver Shine International Company (Phamaceutical factory, Yangon) ah Chief Engineer position in rian a tuan.

International Level in Cawlcanghnak le Oversea Training

1. Myanmar Cozah hnatlakpi nak le Foregin Service Term in ORBIS International Company, US, New York hrambunh, Charity organization (INGO) nih tuahmi free optometical Treatment peknak rian ah Mechanical Repair and Maintenance rian a ttuan i vawlei cung ram thangcho ram 12 ah 1996 Oct-1998 March tiang khual a tlawng. 

2. 1990 in 1991 tiang Japanese International Co-operation Agency (JICA) project in Japan ram ah Medical Equipment Repair and Maintenance Training a rak kai.

3. 1993 ah International Atomic Energy Agency (IAEA) project in China ram ah Advanced Nuclear Electronics Training a rak kai.

4. 2006 ah Korea International Co-operation Agency (KICA) project in Korea ram ah Good Manufacturing Practice Training a rak kai. Private factory ah rian a ttuan hnu in Romania le China tibantuk ah rian kong he pehtlai in khual a tlawng tawn.

 Chin Miphun Social Activities Aa telnak

1. Lai Baptist Church (LBC, Yangon) a dir ka in nihin 2020 tiang Khrihfa upa (EC) ah a tel peng, Deacon chairman, Treasurer le secretary tibantuk a ttuan lengah, Vice President Post term 2, 2000-2001 le 2016-2017 a tuan. Church President term 2, 2002-2003 le 2018-2019 ah a tuan. 

2. 1991-1992 tiang Lai Chiatthat Bu (Yangon) ah Chairman rian a ttuan, 2016-2018 tiang Vice Chairman a ttuan, 2018-2019 tiang Chairman a ttuan tthan, a ttuan chungah Yangon khualipi i Laimi mitlungkal le duhherhtik in hmanding inn saknak caah fund kawlding in USA laimi sin ah an thlah i Pathian nih Laimi thinlung ah rian a tuan i hlawhtlinnak a pek. Amah LCB a ttuan chungah inn zong cu 40 " x 40", Dot 3 in sak a si.

3. David Van Bik Foundation ah 2002 in 2012 tiang EC in a tel i 2012 in 2019 tiang Chairman rian a ttuan.

4. Christian Association of Rural Development (CARD) ah Advisory Board in aa tel

5. Yangon Zophei Zohkhenhnak Bu ah 1987 in 1990 tiang Chairman a ttuan i, 2002-2011 tiang Advisory Board ah a tel.

6. Hakha i Lairal Philhlonak lungphun timhnak i khuakhang laireltu ah a tel.

7. Monywa College i tutor rian a ttuan lio ah 1981-1984 tiang a mah hruainak in Chin National Day zong a rak tuah pi hna.

8. 1983 Myanmar cencus ah Monywa peng in a rak i tel ve.

9. Center for Development and Ethnics Studies (CDES) Yangon ah 2014 in 2020 tiang Board of Directors ah aa tel. (Hlan deuh ahcun Burma Center for Ethnics Studies ti zong a rak si) 

Konglam Tialtu Biapeh

Kawlram ah 2008 phunghram ning in vote nak nawl a ngeimi mipi nih aiawhtu kan thim tik hna ah kan thimmi hna minung hi zeibantuk minung dah an si timi kan i fian dih cikcek a hau, zeirian dah a ttuan i zeibantuk quality le experience dah a ngeih, a tuanbia ah zeibantuk tlamtlin lonak dah a ngeih timi tiang khin kan theih dih hrimhrim hna a hau. Minung kan nunnak ah hmur le ka nakin sining nih bia a chim theu tawn. Cucaah Pu Tial Ling zong hi amah hmur le ka nih bia a chimmi nakin a sining nan zohtik ah zeibantuk minung dah si timi nan i fiang ko lai. Kawlram level in a rianttuannak zoh tik ah mihruai kho le rianttuan kho a si, international level zong in experience tampi a ngeimi a si, Laimi level in zohtik ah kan caah rian a ttuan kho ding kan pa a si. Conruption a huat, a rianttuannak ah Transparency le Accountabilty bakin rian a ttuanmi kan pa a si, mipi he thawngpang i theih le pehtlaih a duh. Cucaah 2020 thimnak ah Hakha peng in Pyithu Hluttaw palai caah pu Tial Ling bantuk mipi aiawhtu khotu le hruaitu ttha kan ngeihding hi a biapi tuk, Chin mi chung hrimhrim ah amah bantuk cozah riansang a ttuan khomi hi an tam lo. A kong na theih bakmi, a sining na hmuhmi le na zumhmi minung kha zoh hmasa, cu hnu ah a party zoh chih, cutin aiawhtu kan thim ahcun kan ram hi tuan ah kan i tinhmi hmun kan phan ko lai. 

Za Biak Cung Nawl

An Mawh Veve Lo!

Rianttuannak in inn ah vun phak chawng khin tuah awk theih lo ah phone an i lak i NLD me kan pek awk a si, CNLD deuh hme teh, miphun party eh kawl party eh, President Thein Sein nakin thil a tuah khomi an um lo tiah biachokvai a ttialmi media tangah comment an pek, weekend caan ah tuah awk um lo i zeihuaha thei lo zong nih sau nawn khin 2008 phunghram remh lo ahcun eh, Miphun party mee pe ko uh tiah kawlram a zaamtak cangmi Pastor an si zongah, bochan mi kan pa le tiah ruahmi an si zongah kawlram um/ a hmun ummi nak in a theihdeuh, hmu dih le a theibik phun in media nih biaruahnak kip ah ka thaw ngai in an chim tik ah, a thei taktakmi le a hmu taktak mi nih an celh ve ti lo i..
UMHARPHENG POLITICS nan tuah ti si ko cang..
Kei cu umharpheng politicians pawl zong an mawh lo i real politicians, thil hmutu taktak zong an mawh lo ka hei ti ko. 😄😀😄 Umharpheng ah😁🤣