Esther Cauk Chung Pathian Rianṭuannak

Persian ukmi ram, ram 127 chung nungak vialte lak i Judah nungak tleirawl Esther, nu le pa zong a ngei ti lomi a pu nih a cawm i fenh-aih ṭetṭiam ṭha zong a ngei ve lomi Siangpahrang nu i a cantermi kha cu a mak nan ti ve lai dah. Modercai ralṭhatnak kha a thuhpiak chung i a caan zaacang ti bak ah Xerxes siangpahrang pumpak sin ah a phuan i laksawng pek a si. Modercai laksawng petu dingah thah a timmi a ral Haman lila kha a thim hoi ko, Modercai thlainak dingah sermi vampang ah thlai a timtu Haman tu thlai a si. Thahtimh mi Modercai kha Siangpahrang changah a kaiter i thah a tim tu siangpahrang chang a si mi Haman tu kha thah a si. Esther chung I Pathian nih rian a ṭuanning hi a mak hringhran.

A Fiangmi

Sifaak santlai lo te, nuhmei ngakṭah te, miphun dang lak ah vitamin a bau nawn mi te, fenhaih ṭetṭiam ngei lo te, tawhrolh belh chom mi te aahruk mi zong hi Pathian nih cawisan a timh ahcun khuaruahhar in milianngan ah an i chuah kho ko timi kha a kan hmuhsak. 

Pathian nih kan thiltuahmi hi a theih dih i amah nih a za a ti caan ah a theipar a kan zunter, minung nih kan duh caan ah si loin kan herh caan te ah Pathian aaphuan zia kha a langhter ngaingai. Ziah ka thlacam a ka leh hnga lo tibantuk, thilṭha ka tuahmi hi a theipar ka zun hnga lo tibantuk lakhruak ruahchannak ngeih loding, Pathian caan le minung caan aa den ning kha fiang ngamsam in a langhter.