Mi Caah Bible Kan Rel Awk a Si Lo

Mi Caah Bible Kan Rel Awk a Si Lo!

*****************************

Laimi kan bible relning, bible kan i chirchandan ka zoh tawn ahhin kan bible rel mi hi mah nih nunpi loin mi biaceihnak tu ah kan hman i bible cacang kan i cinken mi poah in miti kan hmang, bible cacang ah na holh tam hlah ti mi hmu usih law ei ka hawi nu a holh tam ngaimi ca bak si tiphun rumro in kan i la. Mi caah bible kan rel i kan rel mi mah nih i nunpi le kanmah nun bawmtu ah kan hmang duh bak lo. A ngaingai ahcun Bible cu kanmah ca te ah rel in nun i cawmnak ah hmanding khi a si, kanmah nih kan rel i kan i nunpi, kan nun kan i cawm khawh hnu ah kan nun tu in mi va cawmding khi bible nih a kan cawnpiakmi a si Biathlam 1:3 (rel te). 

Bible ca cang i lak duak in mi chehnak i kan hmanmi le biaelnak i teitu sinak men i kan hman tawn hi cu a dik hrimhrim lo mi a si i ṭih zong a nung.  Bible nih a chim ningin nun i zuam le nun nakin bible cacang tampi theihtu kan uar deuh. Bible cacang tampi theih ṭung i nun ah langhter ve lo cu Pakpalawng a si ko.  James 1:22-22 (rel te). Cucaah Bible kan rel tik ah mi caah rel loin kanmah nuncawmnak caah kan relding a biapi tuk. Na bible relmi le na nun zohchih a herh hringhran, bible kan rel pah tik ah kan hawi nu kan hawipa nun ah hrambunh in rel bak loding a biapi tuk. Pathian bia na relnak ah an bawmchan tu si hramseh.