Hmailei Kongah Biakamnak tuah hlah

Hmailei Kongah Biakamnak tuah hlah

A caan le sining, boruak hoih in a nungmi minung, a tu in minute pakhat hnu ah ka nun ah zeidah a cang lai ti hngalh khawh a si lomi nun, minute pakhat dan i a thleng khomi lungthin a ngeimi minung, a fiang bak lomi vawlei ah hmailei kong i biakamnak tuah ṭih a rak nun zia ka hngalh thluahmah. Kan tuah lai kan timi zong caan le sining nih a pek locun tlolh.  Biakam cangmi tlolh le let sual citcet cun thangchiat, hmualpho, mi nih zumh lomi ah i chuah a si ko. Biakam cang mi tuah lo cu Pathian nih a huat lengah minung zong nih huat a si. Cucaah cun teh si lai, Bible nih chiatserh biakamnak tuah hrimhrim hlah uh tiah tu le tu a kan cawnpiak, Jepthah le fanu hmang in a kan chimh, James nih thaizing kongah phorhlawt loding fiang taktak in a chim, (James 4:13-17).  Nu va nih mipi hmai le Pathian hmai i aw thang ngai in biakamnak an tuah i a hmaizarh an i ṭhen/ṭian mi zong hi ṭih nung ngai a si.!!

Hawi le hna hmailei kong chimnak "Lai" timi biafang hman hmanh hi ngamh a hruai lo i ralrin a hau, a fiang lomi na hmailei, na thaizing, kongah biakamnak tuah i ralrin ko tuah, "Lai" hman zong i ralrin hna usih. James 4:15 ahcun, "Pathian nih a rem a ti ahcun timi bia tu hmang uh law" tiah a kan cawnpiak, a sullam cu Pathian lamhruai ning tu in nung tuah uh a tinak khi a si. Cucaah a fiang lomi na hmailei, na thaizing, aa thleng leklek mi na thinlung, na ruahnak kha i fiang law hmailei kong ah  biakam le "Lai (Hmailei kong chimnak)" timi biafang hman hi i ralring cang hna usih.

Keimah pumpak nun ah ka tontukmi a si i nan ciomi a si ve lai ti ka zumh, cucaah ruahṭhannak le nunpi awk ah an bawmtu si hram seh.