Mithleidan, Mi Nautet, Mi Zei ah Rel lo cu Vanram Kai Dawntu a Si

Mithleidan, Mi Nautet, Mi Zei ah Rel lo cu Vanram Kai Dawntu a Si

Zisuh nih Mirum Vanram Kai nakin Kalauk Ṭhimkua luh a Fawideuh a timi Kha na fiang Maw?

Zudah mi nihcun mirum cu Pathian thluachuahmi an si caah vawlei ah an i nuamh lengah vanram cu anmah ta bak a si timi khi an zumh ning a si (Siangpahrang Solomon, an pu Abraham ti bantuk pawl zoh chih in an zumhmi a si). Cu lio i Zisuh nih mirum hna vanram kainak in kalauk ṭhim kua luh a fawi deuh a vun ti ciammam ahcun ho dah kai kho kun lai ma cu tiah an lung a dong, kirtak an duh. (Mathai 19: 23)

Zeiruang ah dah si?

Mitampi nih kan i lehnak ah mirum cu zisuh nakin rumnak an duh deuh caah an rumnak ah an tang i zisuh an zul duh lo timi tiang khi kan i leh khawhmi a si. Sihmanhsehlaw cucu a pian ngaingai i cu nihcun tampi a fianh kho lo. Zeiruang ah dah a si ti ahcun, mi nautetnak lungput le sifak nek le zomhtaih, namneh an hman ca tu ah a si, mirum tamdeuh cu sifaak he rawl ei ṭi le chawnhbiak aa nautetmi an um, mirum an hawi le le sifaak, nuhmei ngakṭah an thleidan hna, sifaak an chawnh biak hna ah neknak bia le zeirel lonak rumro an hman, an zohchuk hna, an rum deuhdeuh i mi zei ah an rel lo deuhdeuh ruangah an rumnak nih vanram kainak a donh hna a tinak hi a si, cucu Biakam hlun Moses phungbia le prophets, Psalm caṭialtu nih fiang taktak in an phuan. Nan umnak nan khua cio zongah zoh hna hmanh uh, mirum le milian ngandeuh nih sifak deuh cu an nek deuh peng hna lai, el awk ṭha lo a si.

A ngaingai ti ahcun mirum lak ah sifaak, nuhmei, ngakṭah santlai lo an ummi hi Pathian nih mirum hna zohkhenh awk ah a chiahmi hna bak kha a si. Cucaah zei ruangah dah Zisuh nih mirum caah van ram kai a harnak kong a chim ti ahcun mirum nih an rian le an rum hnawhchan taktak an i theih lo i sifak bawmhchan le kilkawi lo in a nek tu in an nek hna ruangah a si, kanmah nak sifak deuh hmai ahcun kan rum dih, cucaah hawi nakin na rumdeuh ahcun sullam a ngei, na thluachuah kha nangmah nakin a sifak deuhmi hrawmh le upat khor-awm, zohkhenhnak ah hmuh mi a si. Lazarus le mirum pa tuanbia kha zoh (Luka 16:19-30). Ei awk ngei lo Lazarus cu vanram ah a kal, i mirum pa cu hell ah kal, a ruang na hmuh kolai.

Levitikas 19:10 "Nan mitsur thei nan zun thlu lai lo sifak le mipem caah nan nganh lai." Sifak nun hrawmh a herh zia a langhtertu a si.

Levitikas 19:15 "sifakmi kha duhdanh nan ngei hna lai lo, mi ngan zong kha na zah hlei lailo" minung kan i tluk dih zia a langhtertu a si.

Deuteronomi 15:11, "Ramchung ah sifak cu an dong bal lai lo cucaah, cucaah ram chung a ummi nan u nau sifak le rethei mi hna cu nan kut kau pi in nan sampiak hna lai" Mirum zohkhenh awk ah sifak an um zia a lang.

Deuteronomi 10:18 "Pathian nih pa ngei lo le nuhmei cu ding tein bia a ceihpiak hna i mipem kha a dawt hna". Pathian nih a dirkamh hna zia a fiang, na nek hna ahcun Pathian nih an mah ca in lehrul an cham lainak a lang.

Prophet hna zong nih sifak zohkhanh le duhdanh ngei lo ding in mi an cawnpiak" Isaiah 10:2; 

Israel le Judah siangpahrang sifak zei a rel lomi le a nekmi Pathian nih dan a tatmi hna an tam lengluang.

Phungthlukbia 22:22-23, "Sifak cu sifak an si ruangah zeitik hmanh ah va ramh hna hlah uh" 

Galati 3:28 "Judah, Zental, sal le luatmi nu pa kar ah thleidan nak a um ti lo" kan i tluk dih zia a fiang ngaingai

Rom 2:11 "Pathian nihcun ho poh kha duhdanh/thleidan ngei lo tein bia a ceih hna" Pathian hmai ah kan i tluk zia a fiang ngai.

James 2:1-7 nih Mirum le sihfak thleidan loding kong a kan cawnpiak hna.

Paul nih Philemon sal a simi Onisemus kha unau ṭha bantuk in na cohlan lai tiah Philemon sin ah a nawl piak. (Philemon 1)

Luka 4:18 "Bawipa thlarau cu ka cungah a um, safakmi hna sin thawngṭha chim awk ah chiti a ka thuh i saltangmi hna sin i luatnak thanh awk ah a ka thlah".

Timothy kha Efisa zumtu sal a ngeimi hna le an sal le karlak ah dawtnak le zawnruahnak, sal hmuh in hmuh ti lo in u le nau dawtnak taktak in an i dawtnak hnga kha na cawnpiak hna lai tiah Paul nih bia a cah. Sifak dawtnak le thleidan, nek, zomhtaih hna loding hi Biakam hlun ah voi 93 a chimmi ka hmuh, cun Biakam thar ah 20 ka hmuh, keimah hmuh khawh tawk a si, a tampi rih lai. Cu nih a langhtermi cu kan bible nih sifak le hmei nu hmei pa, ngakṭah dawt le thleidan lo tein zohkhenh a herh zia le mirum hna zohkhenh awk ah sifak hi Pathian nih a chiahmi hna an si ti kha hmuh khawh a si. Kan i tluk zia, i thleidan loding kan si kha a langhter.

Nihin Laimi kan nun ah minung tam deuh kan zia cu kanmah nak harsa deuhmi, mitlamtling lo, sifak, nu hmei, ngakṭah poah cu nek le zumhtaih kan hmang dih, kan i pheh kho hrimhrim lai lo, sifak deuh cu uk kan duh hna i dawt awk aa tlak lo kan ti hna, kan nek deuh hna i mi rum deuh vial cu kan upat hna, kan ṭihzah hna. Sifak deuh le santlai lo deuh poah cu dawt awk zong aa tlak lo, a lo lak tuk tiin an bia hna ceih beh kan hmang, a kan daw kho ṭhan ve ding lawng bak khi kan dawt hna, a ngaingai ahcun cucu dawt a si hrimhrim lo dawtnak sipuaizi tuah tu a si. Dawtnak taktak nih cun minung sining kha a zoh lo, aa tlak le tlak lo timi a hmu hrimhrim lo, hmuh ṭhan awk ruahchan lo tein mi dawt kha dawtnak taktak a si, na dawtmi minung sin in dawt ve ṭhan ding nai ruahchan ahcun na dawtnak cu pakpalawng bak khi a si, dawt kha na rian a si an daw ṭhan ve ding Pathian a um ti hi na philh ka philh lo a herh hringhran. Dawtnak nih mi a thleidang thiam lo. An bawm tu ah 1 Korin 13:4-7 zoh ta ṭhan hmanh.

Mi thleidan, le duhdanh ngeih cu Bible nih a kan cawnpiak ning a si hrimhrim lo. 

Luka 14:12-14 (Rawl ei nan sawm tik hna ah, na hawi kom le na u nau, na sahlawh le na inn pa mi rumrum kha sawm hna hlah zei ca tiah an mah zong nih an i sawm ve lai i na tuahmi kha cham a si ko, 13 rawl danghnak na tuah tik ah misifak, kutzeng, kezeng le mitcaw kha va sawm hna law, an nih nih an i chawm khawh lai lo caah thluachuah na hmu lai.) hihi bak hi a muru cu si ko, fianh len zong a hau ti lomi khi si.

Cucaah mi thleidannak le mi nautetnak lungthin na ngei maw, na nun i chek tuah, a cunglei bible ca cang ka tarmi zoh chih law kan nun i remh hna usih. Thleidan le duhdanh ngeih, mi nautet le sifak santlai lo, nek le zohchuk hi vanram kainak a kan dawn tu vampang le kaidawn an si ti kha fiang tein Zisuh nih a kan cawnpiak. Nangmah nak sifak deuh sin ahcun na rum, cucaah na pawng ah nangmah nak sifak santlai lo le mi harsa an um ahcun Pathian nih thluachuah na hmuhnak dingah an chiahpiakmi an si ti hngal. Lohlak ruangah a si fah zongah dawt awk tlak lo tiding si lo, dawt kha na rian si, a biaceihtu cu Pathian a si. Mi nautetnak lungthin, duhdan ngeihnak thinlung, mi thleidannak thinlung, mi neknak lungthin kan ngeih chung poah cu vamram he kan i hlat rih kolai. Pathian mui keng in sermi minung hi Pathian hmai ah kan i tluk dih, pakhat le khat i nautet ding, thleidan dingah ser kan si lo i pakhat le khat daw ding le i upat, i bawmhchanh in a sunparnak langhter dingah ser kan si. Cucaah thleidannak lungthin kan ngeihmi hlonh hna usihlaw, dawtnak taktak pemh cang hna usih.

Mui dawh deuh nih mui chia deuh nek, mifim nih mi hrut deuh nek, mithiam nih thiam lo deuh nek timi zong aa pehtlai dih. 

Careltu nun bawmtu ah cang hramseh.