Sipuazi in Kan i Daw

Sipuazi in Kan i Daw

Minung a tamdeuh hi a kan daw kho ve te ding lawng dawt kan hmang. Kanmah nak sifaak deuh cu dawt aa hlawh lo kan ti hna. Kan dawtmi hna, thil kan ṭhenh/pekmi hna poah cu kan duh ningin umter dih kan duh hna, an duhnak kan hmuh piak kho hna lo. Kan rak dawtmi hna nih an si thiam lo ruangah kan bia a kan el sual hmanh ah dawtnak hngal lomi minung tiah kan zai. Dawtnak hi a cawih in kan i cawi, kan dawtmi hna poah nih kan cham ve hnaseh ti kan duh. Sifaak nak in bawi le mirum kan dawt deuh hna, mihrut nakin mifim kan dawt deuh hna. Laimi cheukhat kan i dawt dan zong hi  sipuaizi dawtnak a si ko.

A ngaingai ahcun dawtnak kan timi cu kan dawtmi hna sin in ruahchannak ngei lo tein dawt khi a si. Dawtnak taktak nihcun dawt ai hlawh mi le hlawh lomi a zoh hrim lo. Kan bible ah Genesis in biathlam tiang an daw kho ding lawng va daw hna uh ti um ballo, nan dawtmi hna cu va uk hna uh ti zong um lo, dawt aa hlawh lomi cu va daw hna hlah uh ti a um bal lo. A ummi tu cu sifaak le khualtlung, nuhmei le ngakṭah va daw hna uh ti hi prophets le Moses nawlbia nih a chim cem mi a si. Thawngṭha pa 4 ah Jesuh dawtnak fiang taktak in kan hmuh.  Cucaah a fiang ngaimi cu mi kan dawt tikah a kan daw kho ve ding lawng dawt ding a si hrimhrim lo, a lohlak/thathut ruangah a sifaak mi zong dawtding, an lohlaknak kha biaceih piak ding kan si lo zeibantuk minung poah anmah lei thil ruahchannak ngei lo tein dawt dih ding kha Pathian duhmi a si. Kan i ruahchan awk pakhat cu kan tuahmi thil poah kha Pathian nih a philh lo i mi kan dawt hna ahcun a kan daw ve ṭhantu Pathian a um timi hngalh bu tein mi daw hna usih.